داواکاری گشتیی تورکیا داوای 11 ساڵ زیندانیكردن بۆ “سەدەف کەباش” دەکات، کە بە تۆمەتی سووکایەتیکردن بە ڕەجەب تەیب ئەردۆغان سەرۆک کۆماری تورکیا دەستگیركراوە.
مانگی ڕابردوو لەكاتی پێشكەشكردنی پرۆگرامە تەلەڤیزیۆنییەكەیدا لە كەناڵی “تیلی 1″ەوە، سەدەف كەباش ژنە میدیاكاری تورك پەندێكی “چەرکەسی” بە نموونە هێنایەوە و ئەوەش بە سووكایەتیپێكردنی ڕاستەوخۆی ڕەجەب تەیب ئەردۆغان سەرۆك كۆماری توركیا لێكدرایەوە.
كەباش وتی، “پەندێكی زۆر باو هەیە دەڵێت، “ئەو سەرەی تاجی لەسەردەنرێت، داناتر دەبێت، بەڵام پێمانوایە ئەوە دروستنییە، گا بە چوونەناو كۆشك نابێتە پاشا، بەڵكو كۆشك دەبێتە تەویلە”.
بەپێی یاسای تورکیا سووکایەتیکردن بە سەرۆک کۆمار ساڵێک تا چوار ساڵ زیندانیكردنی بۆ دانراوە، بەڵام داواکاری گشتی دەڵێت، کەباش سووکایەتی بە سلێمان سۆیلو، وەزیری ناوخۆ و عادل قەرە ئیسماعیل، وەزیری ڕێگاوبانیش کردووە، بۆیە تێکڕا حکومەکەی 11 ساڵ زیندانییە.
