ئەمساڵ حكومەتی هەرێم و وەزارەتی سامانە سروشتییەكان تەنها 60 ملیۆن لیتر نەوتیان دابەشكردووە، لەكاتێكدا بڕی پێویست بۆ ئەوەی هەر خێزانێك یەك بەرمیل نەوت وەربگرێت، زیاترە لە 250 ملیۆن لیتر.
فەرمانگەی میدیا و و زانیاریی حكومەتی هەرێمی كوردستان لە وەزارەتی سامانە سروشتییەكانی گواستووەتەوە، ئەمساڵ حكومەتی هەرێم 62 ملیۆن و 626 هه‌زار و 511 لیتر نه‌وت دابینكراوه، له‌و بڕه‌ش 60 ملیۆن و 374 دابه‌شكراوه.
ئاشكراشیكردووە، “حکومەتی هەرێم گرێبەستی بۆ دابینکردنی 100 ملیۆن لیتر نەوتی سپی بە بەرزترین کوالێتی کردووە و هەر خێزانێک 200 لیتر نەوتی سپی پێده‌درێت”.
فەرمانگەی میدیا و و زانیاری دەشڵێت، “هەر بەرمیلێك نەوت بە 55 هەزار دینار دابەشدەكرێت بەسەر هەوڵاتییاندا”، لەكاتێكدا ماوەیەك نەوتی سپی بە 90 هەزار دینار دەدرێت بە هاوڵاتییان و وەزیری سامانە سروشتییەكان ئەمڕۆ هۆكارەكەی بۆ ئەوە گەڕاندەوە، كە نەوتەكە لە بەغدادەوە دێت و كرێی گواستنەوەی چووەتە سەر.
قسەی فەرمانگەی میدیا و زانیاری و وەزارەتی سامانە سروشتییەكان لەبارەی ئەوەی هەر ماڵێك بەرمیلێك نەوتی بەسەردا دابەشدەكرێت، لەكاتێكدایە بۆ ئەوەی هەموو خێزانێك یەك بەرمیل نەوت وەربگرێت، هەرێمی كوردستان پێویستی بە نزیكەی 253 ملیۆن لیتر نەوتە و حكومەت تەنها 60 ملیۆنی دابینكردووە.
پێشتر كەمال ئەتروشی وەزیری سامانە سروشتییەكان، كە سەر بە پارتی دیموكراتی كوردستانە، بەڵێنیدابوو، بۆ ئەم زستانە هەموو خانەوادەیەك بەرمیلێك نەوت وەربگرن.
