مستەفا كازمی سەرۆك وەزیرانی عێراق دەڵێت، حكومەتەكەی نیو ملیۆن پارچە زەوی بەسەر هاوڵاتییاندا دابەشدەكات.
كازمی ئەو قسەیەی لە كۆبوونەوەی ئەمڕۆی ئەنجومەنی وەزیراندا كرد و وتی، “مكوڕین لەسەر جێبەجێكردنی پڕۆژەی “خانووەكەم” كە شەش مانگ لەمەوبەر ڕامانگەیاند و لەلایەن وەزارەتی نیشتەجێكردن و ئاوەدانكردنەوە و شارەوانییەكان و نووسینگەی سەرۆك وەزیران و دەستەی ڕاوێژكارانەوە جێبەجێدەكرێت”.
بەپێی وتەی كازمی، پڕۆژەكە لەڕێگەی ناونووسكردنی ئەلیكترۆنییەوە دەبێت و هیچ خزمخزمێنە و بەكارهێنانی دەسەڵات و دەستوەردانی حزبەكان و بەرپرسانی تیادا ناكرێت.
سەرۆك وەزیرانی عێراق ئاشكرایكرد كە زیاتر لە نیو ملیۆن پارچە زەوییان لە گشت پارێزگاكاندا تەرخانكردووە و نزیكەی سێ ملیۆن هاوڵاتی فۆرمیان بۆ وەرگرتنی زەوییەكان پڕكردووەتەوە.
جەختیشیكردەوە كە زەوییەكان جیاكراونەتەوە و خزمەتگوزارییەكانی ئاوەڕۆ، كارەبا، ئینتەرنێت و ڕێگاوبانیان بۆ دابیندەكرێن و لە دوو هەفتەی ڕابردوودا 186 هەزار پارچە لەو زەوییانە دراون بە هاوڵاتییان.
