مەسعود بارزانی سەرۆكی پارتی لێدوانی چەند ڕۆژی ڕابردووی بەرپرسانی حزبەكەی بە لێدوانی لابەلا وەسفدەكات، دەڵێت، تەعبیر لە ڕای پارتی ناكەن.
لە ڕۆژانی ڕابردوودا لەبارەی چەند پرسێكی تایبەت بە عێراق و پەیوەندیی لایەنە سیاسییەكان، قسەی جیاواز لەلایەن بەرپرسانی پارتی و پەرلەمانتارەكانیەوە كران، بۆیە سەرۆكی حزبەكە ناچار بە ڕوونكردنەوە كرا، دەڵێت، “هەر جۆرە لێدوان و بۆچوونێكی لابەلا، ڕای فەرمیی پارتی نییە، قسەی وتەبێژ نەبێت”.
دەقی ڕوونكردنەوەكەی مەسعود بارزانی
بەناوی خودای بەخشندە و میهرەبان
لە ماوەی ڕابردوودا لە ڕاگەیاندن و تۆڕە كۆمەڵایەتییەكان هەندێ لێدوان و بۆچوون بڵاو كراونەتەوە كە زۆرجار وەك هەڵوێست و ڕای پارتی دیموكراتی كوردستان لێكدانەوەی بۆ كراوە.
لێرەدا بە گشت لایەك ڕادەگەیێنین كە هەر جۆرە لێدوان و بۆچوونێكی لابەلا و لەژێر هەر ناو و نیشانێك بێت، پەیوەندی بە سیاسەتی پارتییەوە نییە و، با وەك ڕای فەرمیی پارتی دیموكراتی كوردستان هەژمار نەكرێت.
تەنیا، لێدوانی گوتەبێژی فەرمیی پارتی دیموكراتی كوردستان تەعبیر لە سیاسەت و هەڵوێستی فەرمیی پارتی دیموكراتی كوردستان دەكات.
مەسعود بارزانی
11ی كانوونی دووەمی 2022
