ئەندامێكی کۆنسەی بەڕێوەبەریی کەجەکە دەڵێت، ئازادكردنی عەبدوڵڵا ئۆجالان ڕێبەری پەكەكە نزیكە.
مستەفا قەرەسوو، ئەندامی کۆنسەی بەڕێوەبەریی کەجەکە بۆ میدیای نزیك لە پەكەكە ڕایگەیاند، “تێکۆشانی ساڵی 2021 بۆ ڕێبەر ئۆجالان و دەرهێنانی پەکەکە لە لیستی تیرۆر، ئازادیی جەستەیی ڕێبەر ئۆجالانی نزیککردەوە”.
بەوتەی قەرەسوو، ئەو تێکۆشانەی لە ساڵی 2021دا لەلایەن گەلی کورد و دۆستەکانییەوە کراوە، ئازادیی جەستەیی عەبدوڵڵا ئۆجالان ڕێبەری پارتی كرێكارانی كوردستان (پەكەكە)ی نزیککردووەتەوە.
ئەندامەكەی کۆنسەی بەڕێوەبەریی کەجەکە ڕاشیگەیاند، لە ماوەیەکی نزیکدا ئۆجالان بە جەستەش ئازاد دەبێت و وتی، “23 ساڵە ڕێبەر ئۆجالان لەو زیندانەی لێیدەمێنێتەوە، خزمەتێکی گەورەی بە مرۆڤایەتی و ژنان کردووە، پارادیگما و فکری بەرهەمهێناوە بۆ ئەوەی مرۆڤایەتی ژیانێکی ئازاد بژی، ئەوەش وایکردووە ڕێبەر ئاپۆ لە دڵی گەلاندا ئازادبێت”.
