سەرۆک وەزیرانی عێراق ڕایگەیاند، لەماوەی 2003ەوە تا ئێستا پەیوەندی نێوان حکومەتی بەغداد و هەرێم هێندە باش نەبووە و شانازی بەو پەیوەندییەشەوە دەکەن.
مستەفا کازمی، سەرۆک وەزیرانی عێراق لە کۆتا کۆبوونەوەی ئەنجومەنی وەزیراندا بۆ ئەمساڵ ڕایگەیاند، “گرژییەکانمان لەگەڵ هەرێم کەمبووە و (جتهادات)مان زۆربووە و سوپاس بۆ خودا کە زمانی گفتوگۆ لەنێوان هەردوولا کاری پێکراوە و ئەوەش کاریگەری لەسەر ڕەوتی باشی پەیوەندییەکان هەبووە”.
لەبارەی پەیوەندییە نێودەوڵەتییەکانەوە کازمی ڕایگەیاند، “پەیوەندییە نێودەوڵەتییەکانی عێراق لەگەڵ وڵاتان چووەتەپێشەوە و توانراوە عێراق لەو جەنگە وێرانکەرە چاوەڕوانکراوە بپارێزرێت”.
سەرۆک وەزیرانی عێراق ئاماژەی بەوەکردووە، “ئەو دەستکەوتانەی ئەم حکومەتە بەدەستیهێناوە بە هاوکاری خەڵکی عێراق و وەزیرەکان بووە”.
لەبارەی پرسی تیرۆرەوە لە عێراق کازمی وتی، “لەماوەی ئەم حکومەتەدا هێزە ئەمنییەکان چەندین سەرکردەی گروپە تیرۆرستییەکانیان کوشتووە و دەستگیرکردووە، بەو شێوەیە بەردەوامیدراوە بە پاراستنی خاکی عێراق”.
کازمی لەبارەی بوونی هێزە دەرەکییەکانەوە لە عێراق ئاشکرایکرد، “ئەمساڵ ئەرکی هێزە شەڕکەرەکانی هاوپەیمانان کۆتای دێت و ئێستا هیچ هێزێکی شەڕکەری هاوپەیمانان لەناو عێراق نەماون، ئەوەی ماوەتەوە تەنها کۆمەڵێک ڕاوێژکاری سەربازین، کە بۆ هاوکاری هێزە ئەمنییەکانی عێراق ماونەتەوە لە شەڕی دژبە تیرۆردا”.
