لە دوایین ڕووبەڕووبوونەوەی یانەی ئارسیناڵ بەرامبەر ساوزامپتن، پیێر ئایمیریک ئۆبامیانگ لە پێکهاتەی مایکڵ ئارتێتا دوورخرایەوە، هۆکارەکەشی پەیوەندی بە دیسپلینی یانەکەوە هەبووە.
دوای ئەوەی تۆپچییەکانی لەندەن بە ئەنجامی سێ گۆڵی بێوەڵام بردنەوەیان تۆمارکرد، مایکڵ ئارتێتای ڕاهێنەری ئیسپانی ڕایگەیاند، “پێموابێت تاوەکو ئێستا هەماهەنگیمان لەوپەڕی پابەندبووندابووە کاتێک بابەتەکان پەیوەندیداربوون بەجێبەجێکردنی ڕێسا ناوخۆییەکان، ئەوەی لەگەڵ ئۆبامیانگ ڕوویدا لادانێکی ڕەوشتی بوو، بەهۆی پابەندنەبوونی بە دیسپلینی یانەکەوە لە پێکهاتەکەماندا ناونووسمان نەکرد، دەمەوێت تەنها سەرنج بدەمە سەر کێبڕکێ هونەرییەکان و تەنها ئەوەندە دەڵێم کە لادانی هەبووە”.
بەپێی زانیارییەکانی “زە سەن”، هێرشبەرە گابۆنییە 32 ساڵەکە مۆڵەتی وەرگرتووە و بەهۆکارێکی تایبەت گەڕاوەتەوە بۆ وڵاتەکەی، بەڵام لە کات و وادەی دیاریکراودا نەگەڕاوەتەوە، هەر بەوهۆیەشەوە نەیتوانیوە لە ڕاهێنانەکانی ڕۆژی هەینی بەشداریبکات.
لەبەرامبەر ئەو دواکەوتن و پابەندنەبوونەدا، مایکڵ ئارتێتا بڕیاریداوە لە پێکهاتەکەی دووریبخاتەوە.
