ئەندامێكی كۆنسەی بەڕێوەبەری كەجەكە دەڵێت، حکومەتی هەرێم ڕێگری لە لێکۆڵینەوە لە بەکارهێنانی چەکی کیمیایی بەرامبەر بە گەریلا لەلایەن توركیاوە دەكات.
زوبێر ئایدار، ئەندامی کۆنسەی بەڕێوەبەریی کۆما جڤاکێن کوردستان (کەجەکە) ڕایگەیاند، “ئامانجی ئۆپەراسیۆنە سەرەکییەکان بۆسەر هەرێمەکانی پاراستنی مەدیا، تێکشکاندنی گەریلا و بزوتنەوەکەیە، ئەگەر دوژمن سەرکەوتوو بوایە ئێستا دۆخەکە جیاواز دەبوو، بەداخەوە ڕۆڵی پارتی دیموکراتی کوردستان لەگەڵ دوژمن لەم هێرشانەدا زۆر گەورە بوو، لە هەموو شەڕەکانی کورد-دا هەمیشە هەندێک کورد دوژمن بوون”.
ئایدار لە چاوپێكەوتنێكدا لەگەڵ ئاژانسی هەواڵی ڕۆژنیوز دەڵێت، “پارتی دیموکراتی کوردستان خۆی بەستووەتەوە بە تورکیاوە، یارمەتییەکی گەورە دەداتە دەوڵەتی تورک، ڕێگا لە گەریلا دەگرێت و هێرش دەکاتەسەر گەریلا”، بۆیە دووپاتیدەكاتەوە، سیاسەتەكانی پارتی زیان بە گەلی کورد دەگەیەنێت.
دەربارەی بەكارهێنانی چەكی كیمیایی لەلایەن توركیاوە، ئەندامەكەی كۆنسەی بەڕێوەبەری كەجەكە ئەوەی وت، “دەوڵەتی تورک لە شەڕی دژی گەریلادا سڕبووە، ناتوانێت بەسەر بەرخۆدانی گەریلادا سەربکەوێت و ئێستاش چەکی کیمیایی بەکاردەهێنێت، بە بەرچاوی جیهانەوە لە هەموو شوێنێک ئەو چەکە قەدەغەکراوە بەکاردەهێنێت، گروپێک گەریلا شەهیدبوون و خەڵکی گوندەکانی ئەو ناوچانەش دووچاری زیان بوونەتەوە، ئێمە لەسەر ئەم بابەتە کاردەکەین، بەڵام بەداخەوە جیهان بێدەنگە”.
ڕوونیشیدەكاتەوە، “ئەو شوێنەی چەکی کیمیایی لێ بەکاردەهێندرێت باشووری کوردستانە، حکومەتی هەرێم خۆی هاوکاریی تورکیا دەکات و بە جیهان دەڵێت ئەو چەکە بەکارنەهاتووە، ئەوەی ڕێگەنادات لێکۆڵینەوە بکرێت حکومەتەکانی عێراق و هەرێمی کوردستانن”.
