ئەمڕۆ ڕكابەریە ناوخۆییەكانی خولەكانی ئەوروپا دەستپێدەكەنەوە و چەندین یاریی بەهێز بەڕێوەدەچن.
لە خولی ئینگلتەرا سەرجەم یانە گەورەكانی پێشەوەی ڕیزبەندی یارییان هەیە، مانچستەر سیتی میوانداریی وڵڤەرهامپتۆن دەكات، ئارسناڵ ڕووبەڕووی ساوسامپتۆن دەبێتەوە.
مانچستەر سیتی بە 35 خاڵ پێشەنگی ڕیزبەندیی خولی ئینگلتەرای گرتووە و وڵڤەرهامپتۆنیش لە پلەی هەشتەمدایە.
پێش ئەم یارییە، گواردیۆلای ڕاهێنەری مانچستەر سیتی بۆ جاری دەیەم وەك باشترین ڕاهێنەری مانگ دیاریی كرا لەلایەن ڕایەڵەی خولی تۆپی پێی ئینگلتەراوە.
چێڵسی بەرامبەر لیدز یونایتد یاریی دەكات و لیڤەرپوڵ-یش میوانداریی ئەستۆن ڤێلای جیرارد دەكات.
چێڵسی لە یەك هەفتەدا پێشەنگیی ڕیزبەندیی خولی ئینگلتەرا و پێشەنگی ڕیزبەندیی كۆمەڵەكەی لە خولی یانە پاڵەوانەكانی ئەوروپا لەدەستچوو.
لیڤەرپوڵی كڵۆپیش لە ئێستادا بە باشترین یانەی جیهان ناودەبرێن، لەگەڵ ئەوەشدا لە پلەی دووەمی ڕیزبەندیی خولی ئینگلتەرا دەبینرێن و ئەمڕۆش یارییەكەیان بەرامبەر ئەستۆن ڤێلای یانزەیەمی ڕیزبەندییە.
ئەوەی زۆر گرنگە، گەڕانەوەی جیراردی كاپتنی مێژوویی لیڤەرپوڵە بۆ ئانفێڵد، بەڵام ئەمجارە وەك ڕاهێنەری تیمی دژ.
جیرارد دەڵێت، “بۆ یەكەم جار حەزدەكەم لیڤەرپوڵ شكست بهێنێت”
هەرچی یانەی مانچستەر یونایتدیشە لە دەرەوەی یاریگای خۆی ڕووبەڕووی نۆرویچ سیتی دەبێتەوە.
لە خولی ئیسپانیاش یەك یاریی بەهێز هەیە، كاتێك هەردوو یانەی ئەتلەتیك بلباو و ئیشبیلیە كاتژمێر 11:00ی شەو بەیەك دەگەن.
لۆپیتیگی ڕاهێنەری ئیشبیلیە دەڵێت، كرانە دەرەوەمان لە چامپیۆنز لیگ كۆتایی دونیا نییە و پێویستە بیسەلمێنین ئێمە یانەیەكی بەهێزی ئەوروپاین.
لە ئیتاڵیا یۆڤانتۆس دەبێتە میوانی فینیزیا و میلانیش دەیەوێت پارێزگاری لە پێشەنگیی ڕیزبەندی بكات و ڕووبەڕووی ئۆدینێزی دەبێتەوە.
ئالێگری ڕاهێنەری یۆڤانتۆس دەڵێت ئارسەر میلۆ بەهۆی درەنگكەوتنی لە ڕاهێنانەكان، لەم یارییە دوورخراوەتەوە.
پێشیوایە ڕكابەرەكەیان تیپێكی بەهێزە و بردنەوە لێی ئاسان نییە، (فینیزیا شانزەیەمی ڕیزبەندی خولی ئیتاڵیای گرتووە)
لە خولی ئەڵمانیاش بایرن میونشن یاریی لوتكە بەرامبەر ماینز ئەنجام دەدات و بوروسیا دۆرتمۆندیش دەبێتە میوانی بوخۆم.
یارییەكانی ئەمڕۆ (شەممە)
خولی ئینگلتەرا
مانچستەر سیتی – وڵڤەرهامپتۆن 3:30
ئارسناڵ – ساوسامپتۆن 6:00
چێڵسی – لیدز یونایتد 6:00
لیڤەرپوڵ – ئەستۆن ڤێلا 6:00
نۆرویچ سیتی – مانچستەر یونایتد 8:30
خولی ئیسپانیا
ئەتلەتیك بلباو – ئیشبیلیە 11:00
خولی ئیتاڵیا
فینیزیا – یۆڤانتۆس 8:00
ئۆدینێزی – میلان 10:45
خولی ئەڵمانیا
بوخۆم – بوروسیا دۆرتمۆند 5:30
بایرن میونشن – ماینز 5:30
