بەڕێوەبەرایەتيی كوالیتی كۆنتڕۆڵی جۆری دەرمان و پێداویستی پزیشكی سەر بە وەزارەتى تەندروستى هەرێم ڕه‌تیده‌كاته‌وه كاریان له‌سه‌ر گرانكردنى نرخى ده‌رمان كردبێت و ده‌شڵێن، سکاڵا لەسەر پەرلەمانتارێک تۆمارده‌كه‌ین بەهۆى ئەو تۆمەتانەى ئاڕاستەى کردووین.
بەڕێوەبەرایەتییەکە له ڕاگه‌یه‌ندراوێكدا ئاماژه‌ى به‌وه‌كردووه، “بۆهاوڵاتییان و سەرجەم لایەنە پەیوەندارەكانیش ڕووندەكەینەوە كەوا بە ئەمانەتەوە هیچ بەرژەوەندیەك لەم پڕۆسەیە نییه، جگە لە چاكسازیی و سەلامەتی دەرمان نەبێت”.
جه‌خت له‌وه‌شده‌كه‌نه‌وه، “دڵنیاتان دەكەینەوە كەوا نرخ دانان لەلایەن لیژنەی تایبه‌تمەندی حكومەتەوە دەكرێت، نەك گرانبوونی نرخی دەرمان نابێت، بەڵكو لە ئایندەیەكی نزیكدا داشكان و دابەزاندنی نرخی ده‌رمان ڕادەگەینین”.
دەقى ڕاگەیەندراوەکە:
ڕاگەیه‌ندراوی بەڕێوەبەرایەتیی كوالیتی كۆنتڕۆڵی جۆری دەرمان و پێداویستی پزیشكی KMCA.
هاوڵاتییانی خۆشەویست
لە پێناو بەرچاوڕوونی و گەیشتنی ڕاستیەكان وەكو خۆی و دوور لە چەواشەكاری تایبه‌ت به‌م تۆمەتانەی دوێنی لەلایەن پەرلەمانتارێكه‌وه ئاراستەمان كراوە، بە پێویستمان زانی راست و دروستی بابەتی ستیكەر بخەینەڕوو:
بابەتی ستیكەر هەر لە ساڵانی ڕابردووەوە لەلایەن كەرتی تایبەت، وەكو چاپكردن و دابەشكردن جێبەجێ كراوە، نەوەك لەلایەن حكومەت.
لە كاتێكدا لە پڕۆژەی نوێی چاكسازی دەرماندا، بڕیار دراوە بخرێتە ژێر كۆنتڕۆڵی حكومەت، لە ڕێگەی گۆڕانكاری لە سیستەمی ستیكەر لە شێوازێكی سادەی چاپكردن بۆ سیستەمی گرێدراو بە تەكنەلۆژیای نوێی سەردەمیانە، بۆ كۆنتڕۆڵكردنی دەرمان لە ڕووی جۆر و نرخ و تەواوی جوڵە و دابەشكردنی دەرمان.
بە مەبەستی ڕێگەگرتن لە ساختەكاری و بە پەیڕەوكردنی سیستەمی دژە ساختە و چاودێركردنی سەلامەتی دەرمان لە لایەن لایەنە پەیوەندارەكان و خودی هاوڵاتی، هاوشێوەی سیستەمی دژەساختەی بەكارهێندراو لە چاپكردنی دراوەكان، كە ئەمەش یەكێكە لە هەنگاو و ڕێكارەكانی چاكسازیكردن لە پڕۆسەی كۆنتڕۆڵكردنی دەرمان هەروەك پێشووتر لە ڕاپۆرت و راسپاردەی پەرلەمانی كوردستان ژمارە (4/3/3239) لە 18/11/2019 لە بڕگەكانی 6 و 7ی ڕاسپاردەكراو، هه‌روه‌ها گەیاندنی بەڵێنەكانی چاكسازیمان لەم بوارەدا بووە.
زۆر بەداخەوە بۆ ئاستی بیركردنەوە و قسەكردنی ئەم بەڕێزە بە بەكارهێنانی ووشەی (فەزح و گەندەڵ و خۆپەرست و بەرژەوەندی تاكی خۆیان) بۆ هەموو ئەو كارمەند و بەڕێزانەی كەوا ڕۆژانە لەپێناو بەرژەوەندی هاوڵاتییان كاری كۆنتڕۆڵكردن و چاودێریكردنی دەرمان دەیكەن، ناوهێنانیان بە لیست و هێرشی ناڕەوا و تەشهیركردنی بێ هیچ بنەما و بەدواداچوون و لێكۆڵینەوەیەك، زڕاندنی كەسایەتیان دەكات، و دوور لە ئەتەكێتی پەرلەمانی و پەیڕەویی و یاسایی، تاوانباریان دەكات، كە دەكرا لەڕێگای پەرلەمان پرسیار و بەدواداچوون بكات نەوەك بكەوێتە هەڵەی چەندین بەرژوەندخواز، لە كاتێكدا ئەم پرۆسەیە هەوڵی گەندەڵی ئەم جۆرە كەسانە ڕادەگرێت.
بەداخەوە بێ هیچ پاساوێك هەوڵی بێ ئومێدبوونی هاوڵاتییان و چەواشەكاری دەكات لە كاتێكدا هێشتا هیچ پرۆسەیەكی نوێ نەكەوتۆتە بواری جێبەجێكردن باس لە گرانبوونی دەرمان دەكات بۆ ڕاكێشانی عاتیفە و شێواندنی ڕایگشتی.
بۆ ئەم مەبەستە ڕایگشتی دڵنیا دەكەینەوە كەوا نەك گرانبوونی دەرمان لە ئارادا نیە، بەڵكو پڕۆسەی دابەزاندن و ڕێكخستنەوەی نرخی دەرمان بە ئاراستەی كەمكردنەوەی نرخ و خەرجی لەسەر هاوڵاتییان دەكرێت، بەمەش دڵنیان لە هەر پرۆسەیەكی خزمەت و چاكسازیدا كەسانێكی بەرژەوەندخواز زەرەرمەند و ڕێگر دەبن
ئەم بەڕێزە چەند دۆكیومێنتێكی فەرمی وەكو بەڵگە پێشان دەدات، لە كاتێكدا ئەم دۆكیومێنتانە ڕێكار و ڕێڕەوی یاسایی و كارگێری پڕۆسەكەیە بە ئاشكرا و هیچ شاراوەی تێدا نیە، كە زۆر بە شەفافیانە لە ڕۆژنامەكان بە شێوەی ڕاگەیاندنی ئاشكرا ئەنجامدراوە، تەنانەت لە بەردەم كۆمپانیاكانی پێشكەشكراو پڕۆسەی تەندەر كرانەوەی بۆ كراوە و هیچ ناڕوونیەكی تێدا نیە تا وەكو به تاوان و خیانەت و خۆپەرستی و جەریمە و یاری باسی بكات، بە پێچەوانەوە ڕەچاوی تەواوی ڕێكاری یاسایی و لایەنی پسپۆڕی و هونەری و ستانداردی نێودەوڵەتی كراوە، هاوشێوەی كاری پێشینە لەسەر ئاساتی جیهان بە سود وەرگرتن لە تەكنەلۆژیای نوێی چاودێریكردن و كۆنتڕۆڵكردن دوور لە ساختە و بزربوون و بەربڵاوی هەرەمەكی كە لە پێشوودا جۆرێكی زۆر ئاسایی بە بەربڵاوی و نافەرمی بەدەست دەكەوت، لە ڕێگای نایاسایی و لە دەزگاكانی ڕاگەیاندنیش پێشان دەدرا.
لێرەوە وێڕای ڕەتكردنەوەی تەواوی ئەم تۆمەتانە دەمانەوێت ڕایبگەینین كەوا چەندین لیژنەی پسپۆڕی، بە دواداچوونی ئەم پڕۆسەیەی كردووە و بەردەوام دەبێت لە لێكۆڵینەوە لە هەر تۆمەتێك، نەوەك ئەم بەڕێزە به بێ ئاگایی و بێ ویژدانانە تەشهیر و تۆمەتی ناڕەوا بداتە پاڵ فەرمانبەران
هه‌ر بۆیه ڕێكاری یاسایی و سكاڵا دەخەینە بەردەم دادگا، سە‌رۆكایەتیی پەرلەمان بۆ لێپرسینەوە لەو هەڵوێست و تۆمەت و تەشهیرانەی ئەم پەرلەمانتارە بە چەندین پزیشك و كارمەند و فەرمانبەری كردووە، چۆن دەكرێت پێگەی پیرۆزی پەرلەمانتاری بۆ ئەم شیوازەی ئیهانەكردنی بەكۆمەڵی ئەم بەڕێزانە بكرێت.
بۆ هاوڵاتییان و سەرجەم لایەنە پەیوەندارەكانیش ڕووندەكەینەوە كەوا بە ئەمانەتەوە هیچ بەژەوەندیەك لەم پڕۆسەیە نییه، جگە لە چاكسازیی و سەلامەتی دەرمان نەبێت، دڵنیاتان دەكەینەوە كەوا نرخ دانان لەلایەن لێژنەی تایبه‌تمەندی حكومەتەوە دەكرێت، نەك گرانبوونی نرخی دەرمان نابێت، بەڵكو لە ئایندەیەكی نزیكدا داشكان و دابەزاندنی نرخی ده‌رمان ڕادەگەینین.
بەڕێوەبەرایەتی كوالیتی كۆنتڕۆڵی جۆری دەرمان و پێداویستی پزیشكی KMCA
وەزارەتی تەندروستی
30 تشرینی دووەم 2021
