میدیاكان بڵاویانكردەوە هێزە ئەمنییەكان كەسێكیان بە فیشەك كوشتووە كە بە چەقۆ هەڕەشەی لە ڕێبوارانی شارێكی باشووری فەرەنسا كردووە، ئەمەش دووەم هێرشی ئەمڕۆیە لەو وڵاتەدا.
بەپێی ڕادیۆكە تۆمەتبارەكە دەستەواژەی (ئەڵڵاهو ئەكبەر)ی وتوەتەوە.
پێش نیوەڕۆی ئەمڕۆ لە ئەنجامی هێرشێكدا بە چەقۆ سێ كەس كوژران و دووانی تریش برینداربوون، پۆلیسی فەڕەنساش ڕایگەیاند، تۆمەتباری ڕوداوەكەیان دەستگیركردووە.
ئەو دوو ڕوداوەی ئەمڕۆ لەكاتێكدایە نزیكەی دوو هەفتە لەمەوبەر پاش وتنەوەی وانەیەك دەربارەی ئازادی ڕادەربڕین و نیشاندانی وێنەیەكی كاریكاتێری لەسەر پێغەمبەری ئیسلام، ساموێڵ باتی كە مامۆستایەكی خوێندنگەی ئامادەیی بوو لە فەڕەنسا، لەلایەن خوێندكارێكی بەڕەگەز چیچانی خۆیەوە سەربڕدرا، دواتریش خوێندكارەكە لەلایەن هێزە ئەمنییەكانەوە كوژرا.
ڕوداوەكە كاردانەوەی لەسەر ئاستی ناوخۆ و دەرەوەی فەڕەنسا لێكەوتەوە، لای خۆیەوە ئیمانوێل ماكرۆن، سەرۆكی فەڕەنسا لە لێدوانێكدا ڕایگەیاند، بەردەوام دەبین لە بەرگریکردن لە ئازادی و بەیداخی عەلمانیەت بەرز ڕادەگرین. ئەوەشی وت، “واز لە کاریکاتێر ناهێنین و واز لە وێنە دەستییەکان ناهێنین، ئەگەر ئەوانیدیکەش پاشەکشە بکەن. هەموو ئەو هەلانەی لەسەر شانی کۆمارن بۆ هەموو گەنجانی دەڕەخسێنین بەبێ جیاکاری”.
وتەكانی ماكرۆن نیگەرانی ژمارەیەك لە وڵاتانی ئیسلامی و ڕێكخراو و كەسایەتییە ئیسلامییەكانی لێكەوتەوە و بەهۆیەوە هەندێكیان بایكۆتی شمەكی ئەو وڵاتەیان ڕاگەیاند.
