بەڕێوەبەرانی یانەی نیوکاسڵ، لە یەکەمین هەنگاوەکانیاندا شکستیانهێناوە لە دابینکردنی دوو ڕاهێنەری بەتوانا و ناوداری بواری تۆپی پێ.
ڕۆژنامەی “دەیلی میرەر”ی بەریتانی بڵاویکردووەتەوە، لەگەڵ دەستپێکی کارەکانیان لە یانەی نیوکاسڵ، بەڕێوەبەرانی ئەو یانەیە هەوڵەکانیان بە ئاراستەی زینەدین زێدانی ڕاهێنەری پێشووی ڕیاڵ مەدرید و ئەنتۆنیۆ کۆنتیی ڕاهێنەری پێشووی یانەی ئینتەر میلان دەستپێکردووە.
سەرەڕای دووانەی ناوبراو پەیوەندییان بەهیچ پڕۆژە و یانەیەکەوە نەماوە و لەئێستادا بێکارن، بەڵام لەڕێگەی لێپرسراوی کارەکانیانەوە کارکردنیان لە یانە ئینگلیزییەکە ڕەتکردووەتەوە.
سەرچاوەکە نووسیویەتی، زێدان خەون دەبینێت لە جێگەی دیدیێ دیشامپ پۆستی ڕاهێنەری هەڵبژاردەی فەرەنسا بەدەستبهێنێت، هەروەها ئەنتۆنیۆ کۆنتی لەپلانیدایە ماوەیەک پشووبدات و پاشان لەگەڵ پڕۆژەیەکی گەورەتر لە نیوکاسڵ بگەڕێتەوە.
