ئەندریا پێرلۆ پلانی داڕشتووە لە گواستنەوەکانی هاوینی 2021 دەستبەرداری چەند یاریزانێک بێت، پێشنازەکانیشی بە کارگێڕیی یانەکە ڕاگەیاندووە.
ڕۆژنامەی لاگازێتا دێلۆ سپۆرتی ئیتاڵی ئاشکرایکردووە، بەردەوامبوون یان دوورخستنەوەی پێرلۆ بەندە بە ئەنجامەکانی وەرزەوە، سەرەڕای ئەوەی نازناوی جامی ئیتاڵیای بەدەستهێناوە، بەڵام لە جەنگێکی قورسدایە بۆ بەدەستهێنانی پلەی چوارەمی “سیریا ئەی” و بەشداریکردن لە وەرزی داهاتووی خولی یانە پاڵەوانەکانی ئەوروپا.
ڕاهێنەرە لاوەکەی “خانمە پیرەكە” ،بەبێ گوێدانە هەڵوێستی ئیدارەی ئەندریا ئانێلی، لە کۆتا کۆبوونەوەدا پێشنیازەکانی بۆ مێرکاتۆی هاوینی 2021 و پلانەکانی بۆ وەرزی نوێ ئاشکراکردووە.
ڕاهێنەرەکە داوای یاریزانێکی ڕەخسێنەری گۆڵ و ناوەندکارێکی هێرشبەریی تاکتیکیی کردووە، لە بەرامبەردا دڵنیاییداوە لە بەردەوامبوونی دانێلۆ، کوادرادۆ، ئەدریان ڕابیۆ و مۆراتا (ئەگەر ماوەی خواستنی نوێبکرێتەوە)، لەگەڵ کیلینی و کولوسێڤیسکی.
لە بەرامبەردا ناوەکانی چێزنی-ی گۆڵپارێز و دیمیڕاڵ و ڕامسی و ماککینی و دیبالا-ی خستووەتە لیستی فرۆشراوانەوە.
