ئەستێرەی هەڵکشاوی ئیسپانیا و یانەی وڵڤەرهامپتن، ئاداما تراوری لەم وەرزەدا خراپترین ئاستی پێشكەشکردووە و یانە خوازیارەکانی لێی بەگومانن.
وەرزی ڕابردوو تراوری ئاستێکی ناوازەی پێشکەشکرد و سەرنجی چەندین یانەی گەورەی وەک مانچستەر سیتی و یونایتد و یوڤانتۆس و بەرشلۆنەی بەلای خۆیدا ڕاکێشا، زۆرینەی یانەکان ئامادەبوون بۆندی گونجاوی پێشکەشبکەن.
“دێوەزمەکەی وڵڤەر” لە وەرزی 2019/2020 لە سەرجەم خول و پاڵەوانێتیەکان بەشداری 54 یاریکرد و 3834 خولەک یاریکرد، تۆمارکەری شەش گۆڵ و ڕەخسێنەری 12 گۆڵی دیکە بوو، لە ڕووی هونەری و وەرزشیەوە وەک یەکێک لە باشترینەکانی پریمەرلیگ دەرکەوت.
لەم وەرزەدا (2020/2021) ئاستی یاریزانە ڕەش ئەسمەرەکە گۆڕانکاری بەسەرداهاتووە، شارەزایان پێیان وایە بە خراپترین ساتەکانی ژیانی وەرزشییدا تێپەڕدەکات، بەوپێیەی تاوەکو ئێستا بەشداری 29 یاریی لە سەرجەم خول و پاڵەوانێتیەکاندا کردووە، تۆمارکەری تەنها گۆڵێک بووە و هیچ گۆڵێکی نەڕەخساندووە.
بە تەنها لە خولی نایابی ئینگلیزی تراوری بەشداری 25 یاریکردووە، هیچ گۆڵ و ئەسیستێکی نەبووە، سێ یاری لە جامی یەکێتی یانەکانی ئینگلتەرا کردووە و تەنها گۆڵێکی تۆمارکردووە، یارییەکیشی لە جامی ڕایەڵەی یانەکانی ئینگلتەرا ئەنجامداوە.
