توێژینەوە نوێیەکان دەریانخستووە کاتی خواردنەوەی قاوە کاریگەریی لەسەر دابەزینی کێش هەیە هێندەی جۆری قاوەکە و پێکهاتەکانی.
بەپێی راپۆرتێک کە لە پێگەی هێلس بڵاوکراوەتەوە، قاوە نەک تەنها وزەت پێدەبەخشێت، بەڵکو یارمەتی جەستە دەدات چەوری بسووتێنێت ئەگەر لە کاتی گونجاو و بە رێگەی گونجاو بەکاربهێنرێت.
لە راپۆرتەکەدا هاتووە، ئەگەر لە هەفتەیەکدا کوپێک بۆ حەوت کوپ قاوە بخۆیتەوە، بە تایبەت پێش ژەمەخۆراکییەکان ئارەزووی خواردنت کەمدەبێتەوە و چەوری جەستە بە گشتی و ورگ بە تایبەتی کەمدەکاتەوە.
هەر بەپێی راپۆرتەکە، کاتژمێرێک بۆ نیو کاتژمێر بەر لە وەرزشکردن قاوە بخۆیتەوە کاریگەریی لەسەر زیادبوونی توانای جەستە بۆ جووڵە و چالاکی زیاتردەکات، بەڵام بە پێچەوانەوە خواردنەوەی قاوە لە کاتەکانی شەودا جگە لەوەی خەو تێکدەدات، میتاپۆلیزمیش خاودەکاتەوە.
شارەزایانی بواری خۆراک دەڵێن، بۆ ئەوەی قاوە سوودەکانی لەدەستنەدات نابێت شەکر و پێکهاتەی قورسی بۆ زیادبکرێت، لەبری ئەوە دەکرێت جێگرەوەی شەکر یان شیری کەمچەوری بۆ زیادبکرێت.
