رێكخراوێكی ئەمریكی دەڵێت، كێشەی گەورە كە رووبەڕووی ئابوریی عێراق دەبێتەوە ئەوەیە كە تائێستا مامەڵە بە كاغەز دەكات.
رێكخراوی (ئاڕ ئۆ دەبلیۆ)ی ئەمریكی لە شیكارییەكیدا دەڵێت، جیهانی ئەمڕۆ و تەنانەت وڵاتانی تازەگەشەندووش، سەركەوتووبوون لە پەیڕەوكردنی سیستمی ئاڵوگۆڕی دارایی ئەلیكترۆنی لە مامەڵەكانی رۆژانەدا، ئەو پرسەكەی بەشێوەیەكی بەرچاو پشتبەستنی بە دراوی كاغەز كەمكردووەتەوە و هەلێكی گەورەی بۆ ئابوریی وڵاتان فەراهەمكردووە.
روونیشیكردووەتەوە، ئەو جۆرە مامەڵەیە ئابوریی وڵاتانی تا رادەیەكی زۆر لە كاریگەرییە نەرێنییەكانی خستنەڕوو و خواست لەنێو بازاڕدا پاراستووە، ئەمەیان بەسەر عێراقدا پەیڕەونابێت چونكە “كاغەز پادشایە”.
رێكخراوەكە ئاماژەی بەوەشكردووە، هاوڵاتییانی عێراق متمانەیان بە سیستمی پارەدانی ئەلیكترۆنی یان بانكەكان نییە، تەنها نزیكەی 5%ی هاوڵاتییانی عێراقی ئەژماری بانكییان هەیە.
دەشڵێت، عێراق بەشێوەیەكی گەورە پاشەكشەی كردووە بەهۆی لاوازی یان نەبوونی تەواوەتی سیستمی پارەدانی ئەلیكترۆنی.
بەپێی رێكخراوەكە هۆكارەكەشی تەنها نەبوونی متمانە نییە بە بانكەكان، بەڵكو هۆكارێكی دیكەشی لاوازیی ژێرخانی عێراقییە تایبەت بە پەیوەندییەكان و روونیكردووەتەوە، سەرەڕای ئەوەی حكومەتی عێراق رێگەیداوە بە 15 پێگەی ئاڵوگۆڕی ئەلیكترۆنی، بەڵام نەبووەتە هۆی بەرزبوونەوەی ئاستی ئاڵوگۆڕیی ئەلیكترۆنی، بەهۆی لاوازی تۆڕەكانی ئینتەرنێتەوە.
