هەپەگە ئاماری چوار ڕۆژی شەڕی بڵاوكردەوە و دەڵێت، 141 سەربازی تورکیا لە زاپ و مەتینا و ئاڤاشین کوژراون 23 سەربازی تر برینداربوون.
هێزەکانی پاراستنی گەل – هەپەگە، ئاماری زیانە گیانییەكانی سوپای توركیای لە ماوەی چوار ڕۆژی ڕابردوودا بڵاوكردەوە و دەڵێت، لە شەوی 17ی نیسانەوە تا شەوی ڕابردوو، 141 سەربازی سوپای تورکیا لە ناوچەکانی زاپ و مەتینا و ئاڤاشین کوژراون.
ئامارەكەی هەپەگە ئاشكرایكردووە، لە ماوەی ئەو چوار ڕۆژەدا 23 سەربازی توركیا برینداربوون و سێ فڕۆکەی سیخوڕیی خراونەتە خوارەوە، دوو هێلیکۆپتەریش لەلایەن گەریلاکانی پەكەكەوە پێکراون.
لە شەوی 17ی ئەم مانگەوە، توركیا ئۆپەراسیۆنێكی سەربازیی زەمینی و ئاسمانی بە ناوی “كلیل چنگ” لە باشووری كوردستان بەرپاكردووە و هێرشدەكاتەسەر ناوچەكانی زاپ، مەتینا و ئاڤاشین لە ئامێدی.
