نوێنەری نەتەوە یەکگرتووەکان لە عێراق جینین هێنیس پلاسخارت، ئەمڕۆ بەبۆنەی ڕۆژی جیهانیی ئاوەوە داوا لە وڵاتانی دراوسێی عێراق دەکات کە بەشداری لە گفتوگۆکانی پەیوەست بە چارەسەرکردنی کێشەی سەرچاوە ئاوییەکان، دابەشبوون و مافەکانیان بکەن.
لە پەیامێکدا کە ئەمڕۆ سێشەممە بەبۆنەی ڕۆژی جیهانیی ئاوەوە بڵاویکردووەتەوە جینین پلاسخارت دەڵێت، “لە سەرجەم شوێن و وڵاتەکانی هەسارەکەماندا ئاو نهێنی ژیانە، لەعێراقیش بەکارهێنان و ئیدارەدانی سەرچاوە ئاوییەکان بەشێوەیەکی ڕێکوپێک گرنگیی تایبەتیی هەیە، ئێمە لە مانگی ڕابردوودا سەردانی زۆنگاوەکانی باشووری وڵاتمان کرد بینیمان ڕووبەڕووی ئاڵنگاریی زۆر سەخت بوونەتەوە”.
پلاسخارت ئاماژەی بەوەکردووە، “کەمبوونەوەی بارانبارین، کەمئاوی و بەرزبوونەوەی ڕێژەی خوێ لە ئاو خاکدا، ئیدارەنەدانی سەرچاوە ئاوییەکان بە باشی، گەشەی دانیشتووان سەرجەمیان پاڵنەری کاریگەرن لەسەر کێشەی ئاو لە وڵاتەکەدا”.
پلاسخارت یەکێکی دیکە لە هۆکارەکانی بۆ گۆرانکارییەکانی ئاووهەوا و کاریگەریی لەسەر گرتنەوە و کەمکردنەوەی ئاوی سەرچاوەکان لەلایەن وڵاتانی دراوسێ گەڕاندەوە کە کاریگەریی مەترسیداری لەسەر عێراق هەیە.
ئاماژەی بە مەترسییەکانی کێشەی ئاو کردووە کە تەنها کاریگەریەکانی بەوانەوە ناوەستێت بەڵکو مەترسی دەبێت بۆسەر، هەژاری، ئاوارەبوون و ململانێ و کێشە، ئەو کێشانەش کاریگەرییان لەسەر ئاسایشی عێراق دەبێت و بۆ ماوەیەکی درێژ کاریگەرییەکەی دەمێنێتەوە.
پلاسخارت باس لەوەدەکات کە لەسەر هەموولایەک و وڵاتانی دراوسێش پێویستە بەدەر لەهەر بابەتێکی سیاسی و هەر ناکۆکییەک کاری لەپێشینەیان بۆ ئەو لایەنە تەرخانبکەن و چارەسەری بنچینەیی و خێرای بۆ بدۆزنەوە، لەوەش گرنگتر بەشداریکردنی دراوسێکانی عێراقە لە گفتوگۆکانی دابەشبوونی ئاو و ئیدارەدانی سەرچاوەکانیدا.
