راوێژکارێکی سودانی رایدەگەیەنێت، یاساکانی باج لە عێراق کۆنن و هیچ کاریگەرییەکی لەسەر دۆخی ئابوریی وڵات و هاوڵاتییان نییە.
مەزهەر محەمەد ساڵح، راوێژکاری سەرۆکوەزیرانی عێراق بۆ کاروباری ئابوری ئاشکرایکرد، یاساکانی باج و گومرگ لە عێراق زۆر کۆنن، بەشێوەیەک، ئەو باجەی دەخرێتە سەر خواردن، دەرمان یان هەر بابەتێکی دیکە، هیچ کاریگەرییەک لەسەر ژیانی هاوڵاتییان دانانێت.
وتیشی، بۆ نموونە، باج لەسەر دەرمان بە رێژەی %0.5 زیاددەکرێت نەک %5، ئەمەش باجێکی بێکەڵکە، جیا لەوەش، چەندین کاڵا و شمەکی ناپێویست هەن کە باجیان خراوەتە سەر لە کاتێکدا هیچ گرنگ نین.
ئاماژەی بەوەشکرد، لە هەموو وڵاتانی جیهاندا، سیستمی باج نەویستراوە، بەڵام لە هەمان کاتیشدا حکومەت پاڵپشتیی سێکتەرەکانی خواردن، تەندروستی و کشتوکاڵ دەکات، بۆیە هیچ پێویست ناکات هاوڵاتییان لە سیستمی باج بترسن، چونکە هیچ کاریگەرییەک لەسەر ژیانیان دانانێت.
