بنەماڵەی کەریم خان برادۆستی ئاماژە بەوەدەکەن، بەشداریکردنی محەمەد فەیسەڵ لە دانیشتنی دوێنێی پەرلەمانی کوردستان، بڕیارێکی تاکە کەسییە و پەیوەندیی بە ئێمەوە نییە.
بنەماڵەی کەریم خان برادۆستی ڕوونکردنەوەیەکیان بۆ ڕای گشتی بڵاوکردەوە و تێیدا ئاماژە بەوەکراوە، “ئەوەی دوێنێ ڕوویدا سەبارەت بە بەشداریکردنی (محەمەد فەیسەڵ برادۆستی) لە دانیشتنی پەرلەمانی کوردستاندا، ڕایدەگەیەنین ئەم بڕیارە تەواو تاکە کەسییە و ئێمە وەک بنەماڵەی کەریم خان برادۆستی، بەرپرس نین و گوزارشت لە ڕای ئێمە ناکات”.
ئەوەش خراوەتەڕوو، “ئێمە وەک بنەماڵەی کەریم خان، هەمیشە خاڵی کۆکەرەوە و بەیەکگەیاندن و لەیەکنزیککردنەوەی لایەنەکان بووین لە هەرێمی کوردستان، نەک هۆکارێک بووبین بۆ لێکترازانی لایەنە سیاسییەکانی هەرێمی کوردستان”.
لە کۆتایی ڕوونکردنەوەکەدا ئەوە دووپاتکراوەتەوە، “خانەوادەکەمان بە سەربەخۆیی و دوور لە هەر لایەنێکی سیاسی دەمێنێتەوە و بەردەوامدەبین لە خزمەتکردن بە گەل و نیشتمان”.
