بەرپرسی پۆلیسی دارستان – بەشی خانەقین، ڕایگەیاند، دوای ئەوەی چەند پۆلیسێک باسیان لە کارئاسانی کردووە بۆ ڕاوکردن لە ناحیەی مەیدان، لێکۆڵینەوە لەو بابەتە دەکرێت و لایەنی کەمتەرخەم دەستنیشاندەکرێت.
سەرچاوەیەك لە بنكەی مەیدانی بەڕێوەبەرایەتیی پۆلیسی دارستان و ژینگە بە تۆڕی میدیایی ئێستای وت، “ئێمە ژمارەیەك پۆلیسین ڕۆژانە ئیشەكانی خۆمان بە دڵسۆزی دەكەین، ئیشی ئێمە ئەوەیە نەهێڵێن خەڵك ڕاوبكەن، ڕۆژانە بە ماتۆڕ بۆ ئەو شوێنانە دەچین كە ڕاویان لێدەكرێت”.
وتیشی، “زۆرجار خەڵك دەگرین و تەلەفۆن بۆ ئەفسەری بەرپرسمان دەكەین، كە كەسێك یان زیاترمان گرتووە ڕاویان كردووە، یان تاپڕ و كەرەستەی ڕاویان پێیە”، نمونەی هێنایەوە و ڕایگەیاند، “پێش ماوەیەك چوار كەسمان گرت (كەڵ)ێكیان لەسەر شاخی شەڕواڵدڕە كوشتبوو، ئەفسەری بنكەكەمان لەگەڵ گەیشتنە فەرمانگە، وتی ئازادیان دەكەم، بەڵام ئێمە ڕێگریمان لێكرد”.
هاوڕێ جەلیل، بەرپرسی پۆلیسی دارستان – بەشی خانەقین، بە تۆڕی میدیایی ئێستای ڕاگەیاند، “لیژنەیەک لەسەر ئەو پرسە دروستدەکرێت، لایەنی گلەییکار و ئاسانکار لەسەر ڕاوکردن بانگدەکرێن و هەرکەس کەمتەرخەمبێت سزای خۆی وەردەگرێت”.
پێشتر سەرچاوەیەک لە بنکەی مەیدانی پۆلیسی دارستان بە تۆڕی میدیایی ئێستای وتبوو، لە چەند ڕۆژی ڕابردوودا سێ كەسی دیكە كە دوو پۆڕیان كوشتووە، بەهەمانشێوە كارئاسانییان بۆ كراوە و لەلایەن بەرپرسی بنكەكەوە، كە بەڵێنی ڕادەستكردنیان بە دادگا دراوە، دەستی دەستی بە دۆسیەكە دەكرێت و دوادەخرێت.
