کۆمسیۆنی باڵای سەربەخۆی هەڵبژاردنەکانی عێراق ڕەتیدەکاتەوە ماوەی دەنگدان لەدوای کاتژمێر شەشی ئێوارەوە درێژبکرێتەوە و ڕایگەیاند، “لەدوای کاتی دیاریکراو هیچ کەسێک ناتوانێت دەنگبدات”.
لە لێدوانێکدا بۆ میدیا عێراقییەکان، نەبراس ئەبو سەودە، یاریدەدەری وتەبێژی کۆمسیۆنی هەڵبژاردنەکان ڕایگەیاند، “ئامێرەکانی دەنگدان بەشێوەیەکی ئەلکترۆنی کاردەکەن و لە کاتژمێر 7:00ی بەیانی دەکەونەکار و لە کاتژمێر 6:00ی ئێوارە لەكاركردن دەوەستن”.
دووپاتیكردەوە، “داخران و وەستانی ئامێرەکان بەشێوەیەکی ئۆتۆماتیکییە، بۆیە هیچ کەسێک لەدوای کاتژمێر 6:00ی ئیوارەوە ناتوانێت دەنگبدات”.
ڕەتكردنەوەی درێژكردنەوەی ماوەی دەنگدانی تایبەت لەكاتێكدایە، لە چەند شوێنێك، بەتایبەت وتەبێژی هێزەكانی زێرەڤانی لە هەولێر ڕەخنەی لە سستی بەڕێوەچوونی پرۆسەی دەنگدان هەبوو، بەوەی كێشەیان لە ئامێرە ئەلیكترۆنییەكانی دەنگدان و پەنجەمۆر بۆ دروستبووە.
