ڕاهێنەری ئیتاڵیی یانەی ڕیاڵ مەدرید، کارلۆ ئەنچلۆتی دانی بەوەدا نا پێکهاتەکەی دووچاری ئاستەنگیی هونەری بووە و کێشەیان هەیە.
ئەنچلۆتی ڕایگەیاند، “ماوەی داهاتوو پشووە نێودەوڵەتییەکانمان لەبەردەستدایە بۆ ئەوەی لێکدانەوە بۆ دۆخەکە بکەین، دەمانەوێت بزانین ئەو گۆڕانکارییە چۆن ڕوویداوە و کێشەکە لەچیدایە”.
ڕۆژنامەی مارکای ئیسپانی لەوبارەیەوە ڕاپۆرتێکی بڵاویکردووەتەوە، تیایدا هاتووە کە گۆڕینی پلانی یاریکردن لە 4-3-3وە بۆ 4-4-2 مەودای لەنێوان هێرشبەراندا دروستکردووە، دووچاری نەزۆکی بوون و جگە لە تۆمارکلردنی دوو گۆڵ لەلایەن کەریم بنزیمەی فەرەنسییەوە، بەرامبەر ڤیاڕیاڵ و شیریف تیراسپۆل و ئیسپانیۆل هێرشبەرانی دیکە ئاستیان بەپێی پێویست نەبووە.
لەسەر ئاستی بەرگری و بەهۆی ناجێگیریی پێگەی بەرگری باڵی ڕاست و سەنتەری بەرگرییەوە چوار گۆڵیان لەسەر تۆمارکراوە.
مارکا تەواوی کێشەکان دەخاتە ئەستۆی هێرشبەران، جگە لە بنزیمە، هەروەها پلانی یاریکردن، لەکاتێکدا یانەی شاهانە لەماوەی هەفتەیەکدا یەکسانبوونێک و دوو دۆڕاندنی لە لالیگا و چامپیۆنزلیگ تۆمارکردووە.
