چەند خواردنەوەیەکی سروشتیی وزەبەخش هەن، دەکرێت لە ماڵەکەتدا ئامادەیبکەیت و ببنە جێگرەوەی ئەو خواردنەوە وزەبەخشانەی کە لە بازاڕەکاندا دەیانکڕن، هەروەها ئەو خواردنەوانە وزەبەخشی 100% سروشتین.
پێگەی “بۆڵدسکای” تایبەت بە پرسە تەندروستییەکان بڵاویکردەوە، “پسپۆڕانی خۆراک ئامۆژگاریمان دەکەن بە ئامادەکردنی خواردنەوە و شەربەتە سروشتییەکان لە ماڵەکانی خۆماندا، بۆ دوورکەوتنەوە لە پێکهاتە کیمیاییەکان و خۆپاراستن لە شەکرە زیانبەخشەکانی ناو شەربەت و خواردنەوە ئامادەکراوەکان”.
10 جۆر خواردنەوە کە دەتوانین لەماڵەکانماندا ئامادەیبکەین، وەک وزەبەخشێکی 100% سروشتی:
یەکەم: ئاوی گوێزی هیندی و لیمۆ
ئاوی گوێزی هیندی یەکێکە لە بەسوودترین خواردنەوە سروشتییەکان بۆ ڕێکخستنی پلەی گەرمیی جەستە، تێکەڵکردنی ئاوی گوێزی هیندی لەگەڵ لیمۆ خواردنەوەیەکی سروشتیی دەوڵەمەندە بە پۆتاسیۆم و دەتوانێت وزەیەکی زۆر بە جەستە ببەخشێت و کاری مێشک و کۆئەندامی دەمار چالاکدەکات.
دووەم: زەنجەبیل و هێل
ئەم دوو جۆرە خۆراکە لە بابەتی بەهاراتەکانن، زەنجەبیل هەڵگری “جینجیرۆڵ”ــە، کە یارمەتیدەرێکی باشە لە سوتاندنی چەوری و کەمکردنەوەی کێش، شەربەتی زەنجەبیل و هێل دەوڵەمەندە بە ئۆکسیدەکان و وزەی جەستە بەرزدەکاتەوە.
سێیەم: شەربەتی مۆز و شیر
ئەو دوو خۆراکە ناسراون بە سوودە زۆرەکانیان، یارمەتیی جەستە دەدات لەبەرهەمهێنانی ئەنزیمەکاندا، دەوڵەمەندە بە ژمارەیەک لە ڤایتامین و کانزاکان، بە نمونەی پۆتاسیۆم و فۆسفۆڕ.
چوارەم: مانگۆ
شەربەتی مانگۆ لە بەناوبانگترین خواردنەوە وزەبەخشەکانە، یەکێک لە تایبەتمەندییە باشەکانی لای خەڵک ئەوەیە چەوری دەستوتێنێت، هەر مانگۆیەک هەڵگری 100 دەنکۆڵەی گەرمییە.
پێنجەم: هەنگوین
بەدرێژایی سەردەمەکان هەنگوین بە یەکێک لە بەرهەمە هەرە بەسوودەکانی سروشت دانراوە، یەکێکە لە کۆنترین شیرینییەکان بەر لە دروستکردن و دۆزینەوەی شەکر کە مرۆڤ بەکاریهێناوە، جەستە دەتوانێت بەخێرایی گلوکۆزی پێویست لە هەنگوینەوە وەرگرێت هەروەها وزەبەخشێکی خێرا و بەهێزە.
شەشەم: ئاوی جۆ
جۆ لە پێکهاتەکەیدا ترشە ئەمینییەکان هەیە، کە یارمەتیدەرێکی خێرای بەرزکردنەوەی وزەی جەستەیە.
حەوتەم: شەربەتی گێزەر
شەربەتی گێزەر جەستە پاکدەکاتەوە ماندوێتی ناهێڵێت، یارمەتیدەرێکی بەهێزی کەمبوونەوەی کێش و وزە بەخشێکی خێرایە.
هەشتەم: شەربەتی پرتەقاڵ
پرتەقاڵ لە دەوڵەمەندترین ئەو میوانەیە کە ڤایتامین Cیان تێدایە، یەکێکە لە سەرچاوەکانی وزەی جەستە، هەروەها دەوڵەمەندە بە ڤایتامینەکانی دیکە و کانزاکان.
نۆیەم: ئاوی لیمۆ
پۆتاسیۆم لە پێکهاتە سەرەکییەکانی لیمۆیە و هاۆکارێکی یارمەتیدەری خێرایە لە بەرزکردنەوەی وزەی جەستە.
دەیەم: شیر
خواردنەوەی شیر دەوڵەمەندە بە ڤایتامین B12 و پرۆتین، هەروەها یەکێکە لە بەهێزترین خواردنەوە وزەبەخشەکان، پسپۆڕانی خۆراک ئامۆژگاریمان دەکەن لە حاڵەتی هەستکردن بە ماندوێتی لەسەر کار یان وەرزشکردن، کوپێک شیر دەتوانێت وزەی پێویستمان پێبدات.
