بەهۆی ڕووداوێکی هاتوچۆوە لە ڕێگای نێوان حاجیاوا – چوارقوڕنە، دوو خوێندكار گیانیان لەدەستدا و پێنجی دیكەش بریندار بوون، ڕووداوەكە لەنێوان مینی پاسێكی خوێندكارانی زانكۆی كۆیە و بارهەڵگرێكدا ڕوویداوە.
دوای رووداوەكە، عەلی عەبدوڵا وتەبێژی بەڕێوەبەرایەتیی هاتوچۆی ڕاپەڕین ڕایگەیاند، بەیانیی ئەمڕۆ مینی پاسێکی خوێندکاران لەسەر ڕێگای نێوان حاجیاوا – چوارقوڕنە تووشی ڕووداوی هاتوچۆ بووە و بەهۆیەوە دوو خوێندکار گیانیان لەدەستدا، دووانی دیكەش بریندار بوون.
بەڵام دواتر وتەبێژەكەی هاتوچۆی ڕاپەڕین قسەی بۆ تۆڕی میدیایی ئێستا كرد، بەرزبوونەوەی ژمارەی بریندارەكانی بۆ پێنج خوێندكار ڕاگەیاند.
ئاشكراشیكرد، قوربانییەكان خوێندكاری زانكۆی كۆیە-ن.
پێشتریش بەڕێوەبەرایەتیی هاتوچۆی ڕاپەڕین بڵاویكردەوە، ڕووداوەکە لە كاتژمێر 7:30 خولەكی بەیانی ڕوویداوە، لە جۆری پێكدادان لەنێوان ئۆتۆمبێلێكی بارهەڵگر و مینی پاسێكی خوێندكاراندا بووە.
