ئەستێرەی دێرینی فەرەنسا و یانەی مانچستەر سیتی، سەمیر نەسڕی وازهێنانی لە بواری تۆپی پێ بەشێوەیەکی یەکجارەکی ڕاگەیاند.
ئەستێرە 34 ساڵەکە لەئێستادا وەک شیکەرەوەی کەناڵ پڵەسی فەرەنسا کاردەکات، لە چاوپێکەوتنێکدا بە “لی جۆرنال دو دیمانش”ی ڕاگەیاندووە، “لە ساڵی 2018ـەوە کە تۆمەتباریانکردم بە بەکارهێنانی ماددەی وزەبەخش و بۆ ماوەی 18 مانگ سڕکرام، پەیوەندیم لەگەڵ تۆپی پێ تێکچوو، لەگەڵ ئەوەی من کارێکی وا هەڵەم نەکردووە”.
نەسڕی لە درێژەی لێدوانەکانیدا دەڵێت، “پەیوەندیم بەشێوەیەکی یەکجارەکی بە تۆپی پێوە نەماوە”.
نەسڕی لە یانەی مارسیلیای فەرەنسییەوە دەرکەوت، پاشان هەنگاوینا بۆ خولی نایابی ئینگلیزی و درێسی یانەکانی ئارسیناڵ و مانچستەر سیتی پۆشی، دووجار بەدرێسی سیتییەوە ناسناوی پریمەرلیگی بەدەستهێنا.
ئەستێرە ناودارەکەی فەرەنسا بۆ دوایینجار لە یانەکانی ئیشبیلییە و ئەنتاڵیا سپۆرت و وێستهام یاریکرد، ساڵی 2020 پەیوەندی لەگەڵ یانەی ئەندەرلەخت هەڵوەشاندەوە، لەو وەرزەوە تاوەکو ئێستا بێکارە و پەیوەندی بە هیچ یانەیەکەوە نەماوە.
