وەزیری کشتوکاڵ و ئاودێریی حکومەتی هەرێمی كوردستان، لەبارەی “خراپی و کوشندەیی” ئاردی هاوردەوە ڕایگەیاند، ئاردی هاوردە بەپێی ڕاپۆرتی دەستەی پێوانەسازی و کۆنترۆڵی جۆریی عێراق سەلمێندراوە کە خراپە.
بێگەرد تاڵەبانی، وەزیری کشتوکاڵی هەرێم ڕایگەیاند، “ئاردی هاوردە ئاردێکی زۆر لاوازە لەڕووی ماددە سەرەکییە خۆراکییەکان و زۆرینەی ماددە سەرەکییەکانی لێدەرهێنراون کە لە پێکهاتەی گەنمدان بەمەبەستی بەکارهێنانیان بۆ پیشەسازی نەستەلە و نیشاستە و چەندین جۆر ماددەی خۆراکیی تر، بەتایبەت دەرهێنانی ماددەی گلۆتین و گلۆتامین و ئەنزیماتە بەسوودەکان”.
لەبارەی خراپیی ئاردی هاوردەوە وەزیری کشتوکاڵی هەرێم بە چەند خاڵێک ڕوونیکردووەتەوە:-
ــ جێگرتنەوەی ئەو ماددە خۆراکییە سەرەکییانەی بە ماددەی پیشەسازی و چەندین جۆر ماددەی پارێزەر کە ئەم ماددانە مەترسییان لەسەر تەندروستیی مرۆڤ هەیە.
ــ ئاردی هاوردە لەڕووی بەهای خۆراکییەوە زۆر لاوازە و زیانی زۆری بۆ مرۆڤ و گەشەی مرۆڤ هەیە و لەگەڵ ئەوەشدا زیادکردنی چەندین ماددەی ڕەنگکردن و ماددەی دروستکراوی پیشەسازی کە ئەم ماددانە زۆر مەترسیدارن بۆ تەندروستیی مرۆڤ و سەرهەڵدانی نەخۆشی .
ــ هەموو ئەم ڕاستییانە لەسەرئاستی دەزگا زانستی و کۆنترۆڵی جۆری لەسەر ئاستی تاقیگەیی سەڵمێندراون و بۆ ئەم مەبەستە لیژنەیەکی لێکۆڵینەوە بۆ ئەم بابەتە دروستکراوە لەسەر ئاستی سەرۆکایەتیی ئەنجومەنی وەزیران کە هاوپێچ وێنەیەک لە بڕیارەکانی تێدایە.
