دانیشتووانی گەڕەکێکی هەولێر بەهۆی کەمیی خزمەتگوزارییەوە گردبوونەوە و وەك ناڕەزایەتییەكیش منداڵەكانیان لە قوتابخانە هێنایە دەرەوە.
پێشنیوەڕۆی ئەمڕۆ دووشەممە، دانیشتووانی گەڕەكی تۆپزاوا-ی هەولێر بەهۆی نەبوونی خزمەتگوزاری گردبوونەوەیەكیان ئەنجامدا و وەك ناڕەزایەتییەكیش منداڵەكانیان لە قوتابخانە هێنایە دەرەوە.
دانیشتووانی ئەو گەڕەكە لەمیانی قسەكردنیان بۆ پەیامنێری تۆڕی میدیایی ئێستا ڕایانگەیاند، كێشەی نەبوونی خزمەتگوزارییان هەیە، ئەمە جگە لەوەی لە خوێندنگەی گەڕەكەیاندا قەرەباڵغییەكی زۆر هەیە و 80 خوێندكار لە پۆلێكدان.
دانیشتووانی گەڕەكەكەی هەولێر داوایان لەلایەنی پەیوەندیداركردووە خزمەتگوزارییەكانیان بۆ دابینبكات، “بەڵام تائێستا وەڵامیان نەداوینەتەوە”.
نیگەران بوون بەوەی “بەهۆی كۆبوونەوەی خۆڵ و خاشاك و نەبوونی ئاوەڕۆوە، منداڵەكانیان نەخۆشكەوتوون”.
