بافڵ تاڵەبانی هاوسەرۆکی یەکێتیی نیشتمانیی کوردستان بەبۆنەی یادی 30 ساڵەی دامەزراندنی کەناڵی گەلی کوردستان پەیامێکی پیرۆزبایی ئاڕاستەی ڕۆژنامەنووسان و کارمەندانی کەناڵە کردووە و بە “کەناڵی دایک” ناویدەبات.
لە پەیامەکەیدا هاوسەرۆکی یەکێتیی نیشتمانیی کوردستان پیرۆزبایی لە کارمەندانی کەناڵەکە وەک یەکەم کەناڵی بینراوی کوردیی دوای ڕاپەڕین کردووە و تێیدا هاتووە، “یەكەمین پەخشی تەلەفزیۆنی گەلی كوردستان كە بە وتارە مێژوویی و كاریگەرەكەی سەرۆك مام جەلال دەستیپێكرد، دەستپێكی قۆناغێكی نوێ و گرنگ بوو لە میدیای كوردی و دەستپێشخەرییەكی تری یەكێتی بوو بۆ كۆمەڵانی خەڵكی كوردستان كە تامەزرۆی دەنگ و ڕەنگی ڕەسەنی كوردی بوون”.
بافڵ تاڵەبانی دەشڵێت، ” گەلی كوردستان وەك كەناڵی دایك وێستگەیەكی گرنگ بوو بۆ پێگەیاندنی دەیان ڕۆژنامەنووسی لێهاتوو و بەتوانا و ڕۆڵێكی گرنگی هەبوو لەبەرەوپێشچوونی ڕەوتی ڕۆژنامەوانی و خزمەتكردنی خەڵكی خۆشەویستی كوردستان”.
لە کۆتاییدا بافڵ تاڵەبانی هاوسەرۆکی یەکێتی هیوای بەرەوپیشچوونی زیاتر بۆ کەناڵەکە دەخوازێت تاوەکو لەپاڵ ئەركە پیشەییەكەیاندا ڕۆڵێكی گرنگتر بگێڕن لە گەیاندنی داواكارییەكانی خەڵك و ببنە پردێك لە نێوان هاوڵاتییان و دەسەڵات.
هەروەها پاڵپشتیی خۆی بۆ کەناڵەکە دووپاتدەکاتەوە.
