لە نووسراوێكدا كە ئاراستەی سەرۆكایەتیی ئەنجومەنی وەزیرانی هەرێمی كردووە، وەزارەتی خوێندنی باڵا داوای دامەزراندنی سێ یەكەمەكانی سەر ئاستی زانكۆ و پەیمانگاكان دەكات.
نووسراوەكە بە ژمارە (11092) لە 15ی ئابی ڕابردوو بە واژووی ئارام محەمەد، وەزیرى خوێندنى باڵا و توێژینەوەى زانستى ئاراستەكراوە، دوای ئەوەی سەرۆكایەتیی دیوانی ئەنجومەنی وەزیران داوایكردووە.
وەزارەتی خوێندنی باڵا ڕای خۆی دەربڕیوە و دەڵێت، پێویستیان بە دامەزراندنی سێ یەکەمەکان لەسەر ئاستى بەشەکان لە دەرچووانى ساڵى خوێندنى 2016-2017، لە کۆلێژ و پەیمانگاکان هەیە، بەهۆی ئەوەی ساڵانە ژمارەیەكی زۆری مامۆستا و فەرمانبەران خانەنشین دەبن.
بەپێی زانیارییەكان، كە لە وەزارەتی خوێندنی باڵاوە بە تۆڕی میدیایی ئێستا دراون، چاوەڕوان دەكرێت لە كۆبوونەوەكانی داهاتووی ئەنجومەنی وەزیران داواكارییەكە بخرێتە دەنگدانەوە و بڕیار لەسەر دامەزراندنی یەكەمەكانی ئەو ساڵەی خوێندن بدرێت.
لەماوەی ڕابردوودا دەرچووانی یەكەمی زانكۆ و پەیمانگاكان چەندین خۆپیشاندان و چالاكیی ناڕەزاییان بەهۆی دواكەوتنی بڕیاری دامەزراندنیان ئەنجامدا، تا ئێستاش یەكەمەكانی ساڵی خوێندنی 2016-2017 و ساڵانی دواتر دانەمەزراون و ژمارەیان نزیكەی 5 هەزار دەچوو دەبێت.
