ده‌زگاكانى هه‌واڵگریی ئه‌مریكا، ڕاپۆرته‌كانیان سه‌باره‌ت به ڕه‌چه‌ڵه‌ك و سه‌رچاوه‌ى سه‌رهه‌ڵدانى كۆرۆناوه پێشكه‌ش به جۆ بایدن سه‌رۆكی ئه‌مریكا كرد، وەڵامی یەكلاكەرەوەیان نەداوە بەدەستەوە.
ڕۆژنامه‌ى واشنتن پۆست له‌زارى دوو كاربه‌ده‌ستی ئه‌مریكاوه بڵاویكرده‌وه، بڕیاره له ماوه‌ى چه‌ند ڕۆژێكدا، ده‌زگاى هه‌واڵگریی ئه‌مریكا (سی ئاى ئه‌ی) ڕاپۆرتێكی نانهێنی له‌باره‌ى ڕه‌چه‌ڵه‌ك و سه‌رچاوه‌ى سه‌رهه‌ڵدانى ڤایرۆسی كۆرۆناوه بخاته‌ڕوو.
به‌گوێره‌ی ڕۆژنامه‌كه، ئه‌و ڕاپۆرتانه‌ى كه دوێنێ ده‌زگاكانى هه‌واڵگریی ئه‌مریكا داویانن به سه‌رۆك بایدن، هاوڕانین سه‌باره‌ت به سه‌رچاوه‌ى كۆرۆنا و یه‌ك بۆچوونیان نییه، كه ڤایرۆسه‌كه له‌كوێ دروستبووه و سه‌ریهه‌ڵداوه.
دوێنێ جین ساكى وته‌بێژی كۆشكی سپی ڕایگه‌یاند، كۆپییه‌كی نانهێنی ئه‌و ڕاپۆرته‌ى ئه‌مریكا له‌باره‌ى ڕه‌چه‌ڵه‌كی ڤایرۆسی كۆرۆناوه ئاماده‌یكردووه، بۆ ڕایگشتی ئاشكراده‌كه‌ن.
جۆ بایدن سه‌رۆكی ئه‌مریكا له مانگى ئایاری ڕابردوودا، مۆڵه‌تی 90 ڕۆژی دابوو به یاریده‌ده‌ره‌كانى تاوه‌كو له‌و ماوه‌یه‌دا سه‌رچاوه‌ى دروستبوون و سه‌رهه‌ڵدانى كۆرۆنا ئاشكرابكه‌ن.
ده‌زگاى هه‌واڵگریی ئه‌مریكا (سی ئای ئه‌ی) پێیوایه سه‌ره‌تای سه‌رهه‌ڵدانى ڤایرۆسی كۆرۆنا ده‌گه‌ڕێته‌وه بۆ چین و ده‌ڵێت، “ڕووداوێك له تاقیگه‌یه‌كی چین-دا ڕوویداوه و سه‌رئه‌نجام دروستبوونی ڤایرۆسه‌كه‌ى لێكه‌وتووه‌ته‌وه و له‌وێوه دزه‌یكردووه”.
له‌به‌رامبه‌ر ئه‌و بانگه‌شه‌یه‌دا، چین ناڕه‌زایی ده‌ربڕیوه و ئه‌مریكاى تۆمه‌تباركردووه به‌وه‌ی “له‌ڕێگه‌ى بیردۆزی پیلانگێڕییه‌وه، ده‌یه‌وێت چین بكات به سه‌رچاوه‌ى سه‌رهه‌ڵدانى كۆرۆنا”.
