پەرلەمانی یەکێتیی ئەوروپا داوای لە کۆمپانیاکانی بەرهەمهێنانی مۆبایل، بەتایبەتی کۆمپانیای ئەپڵ کردووە، کێبڵێکی شەحنی هاوبەش دروستبکەن کە بۆ هەموو مۆبایل و تابلێتەکان بشێن.
ئەم پێشنیارەش ڕەنگە ببێتە ئاڵەنگارییەک بۆ کۆمپانیای ئەپڵ، کە یەک ملیار ئایفۆن و ئایپادی هەناردەکردووە و کێبڵی لاتینینگ “Lightening”ـیان بۆ بەکاردێت.
بە وتەی بەرپرسانی یەکێتیی ئەوروپا، ئەگەر کێبڵی شەحنەکان بگۆڕدرێن و بکرێنە یەک کێبڵێ جیهانی، ئەوا ژیانی بەکارهێنەرانی ئاسانتر دەبێت و یارمەتی ژینگەش دەدات، بەوپێیەی کێبڵە کۆنەکان ساڵانە ٥١ هەزار تۆن پاشماوەی ئەلیکترۆنیی لێدەکەوێتەوە.
یەکێتیی ئەوروپا چەندین ساڵە داوا دەکات یەک کێبڵی جیهانی دروستبکرێت. مانگی کانوونی دووەمی ساڵی ڕابردووش، کۆمپانیای ئەپڵ ڕایگەیاند، “یاسایەکی لەو شێوەیە داهێنان دەکوژێت، زیان بە ژینگە دەگەیەنێت و بەکارهێنەرانیش بێزار دەکات”.
