بانکی ناوەندیی عێراقی ئاشکرایکرد، پارە و یەدەگی عێراق بەپێی یاسا کارپێکراوەکانی ویلایەتە یەکگرتووەکانی ئەمریکا پارێزراوە و ناتوانرێت دەستیبەسەردابگیرێت.
لە ڕاگەیەندراوێکدا بانکی ناوەندیی عێراق بڵاویکردەوە، لایەنە یاساییەکانی ئەمریکا دڵنیاییان داوەتە پارێزگاری بانکی ناوەندیی عێراق، سەرجەم سامان و پارە یەدەگەکانی بانکی ناوەندیی عێراق پارێزراوە و هیچ لایەنێک ناتوانێت دەستیان بەسەردابگرێت، جەختیشیکردەوە ئەوان بەرگری لەپارێزبەندییەکەیان دەکەن بەرامبەر هەموو وڵاتان و ناکرێت مەترسی لەسەر ئەو پارە یەدەگانە دروستبکرێت.
باسیلەوەشکردووە، عێراق لە ماوەی كەمی داهاتوودا سەرجەم ئەو قەرەبوو و سوودانە دەداتەوە، كە لە پێش ساڵی 2003وە لەسەریەتی، ئەمەش دەبێتە هۆی لابردنی پارێزبەندیی نێودەوڵەتی لەسەر سامان و پارە یەدەگەکانی عێراق لە دەرەوەی وڵات.
بەپێی ڕاگەیەندراوەکە، ئەو لایەنە یاساییانەی ئەمریکا جەختیانکردووەتەوە، سامان و پارە یەدەگکراوەکانی عێراق، بەپێی یاسا کارپێکراوەکانی ئەمریکا پاڵپشتیکراون، بەڵێنیانداوە بە پارێزگاریکردن لەو پارانەی لەبانکی ناوەندی و وڵاتانی دیکەش هەن.
ڕاگەیەندراوەكەی بانكی ناوەندیی عێراق لەبارەی پارێزراویی پارە و یەدەگی وڵاتەكە لە ئەمریكا، هاوكاتە لەگەڵ كۆتاییهاتنی گفتوگۆی ستراتیژیی نێوان واشنتن و بەغداد.
