خۆبەڕێوەبەریی ڕۆژئاوای كوردستان بڕیاریداوە “پەیمانی كۆمەڵایەتی” هەمواربكرێتەوە و مەبەست لەو هەنگاوەش “بەرجەستەكردنی دیموكراسیەتی زیاترە”.
ئیدارەی خۆبەڕێوەبەریی باکوور و ڕۆژهەڵاتی سوریا بڕیاریدا پەیمانی كۆمەڵایەتی هەمواربكاتەوە و بۆ ئەو مەبەستە لیژنەیەكی بەرفراوان پێکهێندراوە، كە نوێنەرانی چین و توێژەكانی كۆمەڵگا تێیدا ئەندامن.
ئاژانسی هەواڵی ڕۆژنیوز نزیك لە پەكەكە بڵاویكردوەتەوە، “هەمواركردنەوەی پەیمانی كۆمەڵایەتیی باكوور و ڕۆژهەڵاتی سوریا بە ئامانجی پەیڕەوكردنی بەرزترین ئاستی دیموكراسی و دەستنیشانكردنی كەموكورتییەكانە”.
بەپێی ئەو بەرنامەیەی بۆ هەمواركردنەوەی پەیمانەكە دانراوە، دەبێت لەماوەی دوو مانگی دیكەدا بنووسرێتەوە و تەواوبكرێت.
بۆ یەكەمجار لە 21ی كانونی یەكەمی 2014 بە بەشداری (كورد، عەرەب، چەرکەس، ئەرمەن، سوریانی، تورکمان و پێکهاتە جیاوازەکانی کۆمەڵگا) لە ڕۆژئاوای كوردستان پەیمانی کۆمەڵایەتی نوسرایەوە و بوو بە بناغەی خۆبەڕێوەبەریی دیموکراتی لەو بەشەی كوردستان.
لە 29ی كانونی یەكەمی 2016 پەیمانەكە هەمواركرایەوە و ئەم هەنگاوەی ئێستاش دەبێتە دووەم هەموار.
پەیمانی كۆمەڵایەتی لە 94 ماددە پێکدێت، یەكێك لە بڕگە و ماددە جیاوازەكانی ئەوەیە، کە خۆبەڕێوەبەری پابەند دەکات بە بەشداریی ژن بەڕێژەی 50٪، واتە هاوسەنگیی تەواوی ڕەگەزی دەپارێزێت.
