فەرمانگەی ئاوی قەڵادزێ، هاوڵاتییانی سنوورەكە لە مەترسییەك ئاگاداردەكاتەوە و دەڵێت، سەوزە بە ئاوەڕۆی زێراب ئاودەدرێت.
فەرمانگەی ئاوی قەڵادزێ لە ئاگادارینامەیەكدا بۆ هاوڵاتییانی دانیشتووی قەڵادزێ و دەوروبەری ڕایگەیاند، “لە نزیک وێستگەی کارەبای قەڵادزێ ( گوندی سەرتەپکان) بەشێکی زۆری زەوییەکانی ئەو شوێنە کراوە بە سەوزەی وەکو (کەوەر، کەرەوز، بامێ، باینجان، خەیار، ماشەسپی) هەمووی بە ئاوی زێراب و ئاوەڕۆی گەڕەکی ڕاپەڕین ئاودەدرێت”.
فەرمانگەكە داوای خۆپارێزی لە هاوڵاتییان دەكات و دەڵێت، “لەو شوێنە ئاوەڕۆی سەرەکی شکێندراوە بۆ ئاودانی ئەو سەوزانە، خواردنی بەروبوومی ئەو شوێنانە هۆکار و سەرچاوەی سەرەکین بۆ بڵاوبوونەوەی سکچوون و ڕشانەوە، تکایە ئاگاداربن”.
بۆ چارەسەركردنی گرفتەكە، فەرمانگەی ئاوی قەڵادزێ داوا لە لایەنی پەیوەندیدار دەکات بە زووترین کات ئەو کێشەیە چارەسەربکات و ئاوەڕۆکە چاکبکرێتەوە و ڕێگەنەدرێت ئاوی ئەو ئاوەڕۆیە بۆ کشتوکاڵ بەکاربهێنرێت.
