یانەی پاریس سان جێرمانی فەرەنسی گرنگی بە میرالیم پیانیچی بۆسنی دەدات، ئەگەرێکی بەهێز هەیە لە هاوینی 2021 بۆندەکەی واژووبکرێت.
ڕۆژنامەی موندۆ دیپۆرتیڤۆی کەتەلۆنی لەزاری سەرچاوە فەرەنسییەکانەوە ئاشکرایکردووە، گرنگیپێنەدانی ڕۆناڵد کومان بە میرالیم پیانیچ، یاریزانەکەی گەیاندووەتە ئەو بڕیارەی لە هاوینی 2021 ڕوو لە یانەیەکی دیکە بکات.
بەپێی سەرچاوەکان، نوێنەرانی یانەی پاریس سان جێرمان چاودێریی ناوەندکارەکەی بەرشلۆنە دەکەن، لە پلانیاندایە لە چەند هەفتەی داهاتوودا بۆندی پێشکەشبکەن.
ڕۆژنامەکە ئاماژەی بەوەکردووە، خوان لاپۆرتا و هاوکارانی سەرنجیان لەسەر پیانیچ نییە و ئامادەن بیفرۆشن، لە ئێستاشدا سەرنجی تەواویان خستووەتە سەر کێشەی باڵی چەپی بەرگری، بەوپێیەی ئەلبا تەمەنی هەڵکشاوە و جونیۆر فێرپۆ نزیکە ڕوو لە یانەیەکی خولی ئیتاڵیا بکات.
لە بەرامبەر ئەم زانیارییانەشدا موندۆ دیپۆرتیڤۆ نوسیویەتی، وەک جێگرەوەی فێرپۆ، بەرشلۆنە سەرنجی خستووەتە سەر مارکۆس ئەلۆنسۆی بەرگریکاری ئیسپانی یانەی چێڵسی.
