هێرشبەری ئەڵمانی یانەی چێڵسی، تیمۆ ڤێرنەر ڕەخنەی توند لە هێڵی بەرگری یانە ئینگلیزیەکەی دەگرێت و دووپاتیدەکاتەوە، بەو ئاستەوە ناتوانن کێبڕکێ بۆ نازناوەکان بکەن.
هەروەها دەڵێت، ” ئێمە چێڵسین و دەمانەوت نازناوەکان بەدەستبهێنین، لە ئەڵمانیا دەڵێین بەرگری نازناوەکان دەچنێتەوە، ئەوەش بۆچوونێکی ڕاستە، کاتێک لە ڕوبەڕوبوونەوەکاندا گۆڵی زۆرمان لەسەر تۆماربکرێت، مەحاڵە بتوانین دەستکەوتەکان بچنینەوە”.
لە یەکێکی دیکە لە وەڵامەکانیدا دەڵێت، ” بەڕای من دەبێت خوێندنەوەی دیکە بکەین لەسەر تۆمارکردنی شەش گۆڵ لە سێ یارییدا لەسەر یانەکەمان، ڕێژەیەکی زۆرە و نابێت بەم بارودۆخە بەردەوامبێت، پێویستە باشتر دەرکەوین”.
لێدوانەکانی ڤێرنەر بە ئاشکرا دەریدەخات، کە هێرشبەرانی یانە لە ئاستی هێڵی بەرگری ڕازینین، بەڵکو لێدوانەکانی ڤیرنەر پەیامێکە بۆ فرانک لامپاردی ڕاهێنەر و پێکهاتەی بەرگری بلوزی لەندەن تاوەکو بە زووترین کات کێشەکان چارەسەربکەن، ئەگەرنا لەم وەرزەدا ناتوانن ململانێی یانە گەورەکانی دیکە بکەن بۆ نازناوی پریمەرلیگ.
