وتەبێژی پۆلیسی دهۆك ڕایگەیاند، تەرمی ژنێک لە قەزای بەردەڕەش دۆزراوەتەوە، كە ئاسەواری گوللە بەجەستەیەوە دیاربووە و ناسنامەکەشی دیارنییە.
هێمن سلێمان، وتەبێژی پۆلیسی دهۆك بە تۆڕی میدیایی ئێستای ڕاگەیاند، “دوانیوەڕۆی ئەمڕۆ تەرمی ژنێک بە کوژراوی لە گوندێکی نزیک قەزای بەردەڕەش دۆزراوەتەوە، دواتر تەرمەکەی گواستراوەتەوە بۆ پزیشکی دادی لە دهۆک”.
وتیشی، تائێستا ناسنامەی ژنە كوژراوەكە دیارنییە ،بەڵام پێشبینی دەکرێت تەمەنی لە نێوان 30 تا 35 ساڵ بێت و شوێنەواری گوللەش بەجەستەیەوە دیارە.
وتەبێژی پۆلیسی دهۆك باسیلەوەشكرد، لێکوڵینەوە لەلایەن پۆلیسەوە دەستیپێکردووە بۆ زانینی هۆکاری تاوانەكە.
