ئەستێرەی بەرازیلی یانەی یوڤانتۆس، دوگلاس کۆستا لەگەڵ یانەیەکی بەرازیلی دەستی بە دانوستاندن کردووە و بڕیاریداوە لە دوای وادەی خواستنی لە بایرن، نەگەڕێتەوە بۆ ئیتاڵیا.
ڕۆژنامەی بێلد سپۆرتی ئەڵمانی ئاشکرایکردووە، کە بۆندی کۆستا و بایرن کۆتاییهاتووە و باڵە فڕیوەکەی بەرازیل خراپترین وەرزی بەڕێکردووە (22 یاری و گۆڵێک)، لە کۆتایی وەرزدا بە ناچارییەوە دەبێت بگەڕێتەوە بۆ یانەی یوڤانتۆس بەوپێیەی وەرزێک لە بۆندەکەیدا ماوە.
بەڵام ئەوەی ڕوودەدات شتێکی دیکەیە..
کۆستا لەگەڵ یانەی گریمیۆی بەرازیلی چووەتە سەرهێڵ و دەستی بە دانوستاندن کردووە، تاوەکو یوڤانتۆس کۆتایی بە بۆندەکەی بهێنن و پەیوەندی بە یانە بەرازیلییەوە بکات.
بێلد نوسیویەتی، یاریزانەکەی یوڤی ڕەزامەندی دەربڕیوە موچەکەی بەشێوەیەکی بەرچاو کەمبکاتەوە، تەنها بۆ ئەوەی دوو وەرز و نیو بۆند لەگەڵ یانەکەی پۆرتۆ ئالێگری واژووبکات.
لەم بارەیەوە مارکۆس هێرمان، جێگری سەرۆکی گریمیۆ ڕایگەیاندووە، ” لەگەڵ کۆستا لە گفتوگۆیەکی پێشکەوتووداین، دڵنیام لە هەڵوەشاندنەوەی بۆندەکەی سەرکەوتوو دەبێت و پەیوەندیمان پێوەدەکات، تەنانەت ڕەزامەندی دەربڕیوە دەستبەرداری موچە خەیاڵییەکەی ئەوروپای ببێت بۆ ئەوەی لەگەڵ سیستمی دارایی ئێمەدا خۆی بگونجێنێت”.
