چەند موشەكێك لە باشوری لوبنانەوە ئاراستەی ئیسرائیل كران، موشەكەكانیش لەلایەن سوپای ئەو وڵاتەوە تێكشكێنران.
میدیاكانی ئیسرائیل بڵاویانكردەوە، سێ موشەك لە باشووری لوبنانەوە ئاڕاستەی ئیسرائیل كراون و لەلایەن سوپای وڵاتەكەیانەوە تەقینراونەتەوە.
هاوكات ئەفیخای ئەدرەعی، وتەبێژی سوپای ئیسرائیل لە تویتێكدا ڕایگەیاندووە، سێ موشەكەكە، لە شوێنێكی گەشتیاریی نزیك دەریای سپی تەقینراونەتەوە و هیچ زیانێكی گیانی لێنەكەوتووەتەوە.
لەلایەكی دیكەشەوە بەگوێرەی زانیارییە میدیاییەكان، فڕۆكەكانی ئیسرائیل بە ئاسمانی لوبناندا دەسوڕێنەوە و چاودێریی ناوچەكە دەكەن.
ماوه‌ی زیاتر لە هه‌فته‌یه‌كه، شه‌ڕ و پێكدادان لە نێوان ئیسرائیل و حەماس لە كەرتی غەززە بەردەوامی هەیە، بەگوێرەی ئامارەكانیش نزیكەی 300 فەڵەستنی برینداربوون و 56 هاوڵاتی كوژراون، ژمارەیەك سەركردەی حەماسیش لەنێو كوژراوەكانن، هەروەها 17 ئەندامی هێزە ئەمنییەكانی ئیسرائیل برینداربوون، و پێنج هاوڵاتی ئەو وڵاتەش بەهۆی موشەكەكانی حەماسەوە كوژراون.
