هێرشبەری ئەرجەنتینی یانەی ئینتەرمیلان، لاوتارۆ مارتینێز ڕەتیدەکاتەوە پەیوەندی بە یانەی ڕیاڵ مەدرید، یان هەر یانەیەکی دیکەی ئیسپانیاوە بکات.
لە چاوپێکەوتنێکی میدیاییدا سەبارەت بەو هەواڵانەی ئاماژەیان بە دانوستاندنی نێوان یاریزانەکە و یانەی ڕیاڵ مەدرید کردووە، لاوتارۆ مارتینێز ڕایگەیاندووە، ” هیچ شتێک لەبارەی ئەم پڕوپاگەندانەوە نازانم، من لە ئینتەرمیلان بەختەوەرم، لە ئێستادا سەرقاڵی گفتوگۆکردنین بۆ نوێکردنەوەی بۆندەکەم، بەم نزیکانە بە ڕێککەوتن دەگەین”.
هەروەها لەبارەی یانەی بەرشلۆنە و هەوڵەکانی هاوینی ڕابردووەوە، دەڵێت، ” هەوڵێکی ڕاستەقینە هەبوو بۆ پەیوەندیکردنم بە یانەی بەرشلۆنەوە، بەڵام بە خۆشحاڵییەوە ڕووینەدا و بڕیارمدا لە ئینتەرمیلان بەردەوامبم”.
لە چەند ڕۆژی ڕابردوودا میدیاکانی ئیسپانیا ئاماژەیان بە دەستپێکی دانوستاندنەکان کرد، لە نێوان جەمسەری لاوتارۆ و ئیدارەی یانەی ڕیاڵ مەدرید، بەڵام وەک دەردەکەوێت یاریزانەکە هەموو ئەو زانیارییانە بە پڕوپاگەندە لە قەڵەمدەدات.
بۆندی لاوتارۆ لە ڕیزەکانی نێراتزۆری تاوەکو هاوینی 2023 بەردەوامی دەبێت، لە ئێستادا یاریزانەکە و لێپرسراوی کارەکانی سەرقاڵی دانوستاندنن بۆ نوێکردنەوەی بۆندەکەی تاوەکو هاوینی 2026، بەو مەرجەی موچە و ئیمتیازاتی باشتر بەدەستبهێنێت.
