بەرپرسانی تۆپی پێی ئینگلتەرا و یانە گەورەکانی ئەو وڵاتە پێشنیئازی فراوانکردنی مەودای کێبڕکێکانیان کردووە، ئەگەر هەیە یانە گەورەکانی خولی سکۆتلەندا تێکەڵ بە یانەکانی پریمەرلیگ بکرێن.
ڕۆژنامەی زە سەنی بەریتانی ئاشکرایکردووە، لە ئێستادا بەرپرسانی فیدراسیۆنی تۆپی پێی ئینگلتەرا و ڕایەڵەی یانە پیشوەرەکان تاووتوێی پێشنیازی فراوانکردنی خولی نایابی ئینگلیزی دەکەن، بۆ ئەم مەبەستەش شەش یانە گەورەکە کە پێشتر لە بیرۆکەی سوپەری ئەوروپی بەشداربوون، لەهەوڵدان پلانەکە بە ئەنجام بگەیەنن.
بەپێی زانیارییەکان، یانەکانی سێڵتیک و گلاسگۆ ڕەینجەرز هاوشانی یانەکانی ئینگلتەرا بەشداری پریمەرلیگ دەکەن، هەروەها ڕێژەی یانە بەشدارەکان بۆ 18 یانە کەمدەکرێتەوە، کە ئەوەش دەرفەتی کێبڕکێکاری زیاتر بە یانە بەشدارەکان دەبەخشێت.
یەکخستنی یانەکانی سکۆتلەندا لەگەڵ یانەکانی پریمەرلیگ دوو ئامانجی گەورە دەپێکێت، لەلایەک کاریگەری وەرزشیی لەسەر ئاستی جیهانی دروستدەکات، لەلایەکی دیکەوە کاریگەری جەماوەری و بازرگانی گەورەی دەبێت و مافی سەرجەم یانەکان زیاتر دەکات، بەو مەرجەی سپۆنسەرەکانی خولی سکۆتلەندا بەشداری پڕۆسەکە بکەن.
