وتەبێژی دەستەی ژینگەی هەرێم دەڵێت، ئەو گازەی ڕوو لە ئاسمانی ناوچەكە دەكات زۆر زۆر مەترسیدار نییە، بەڵام هۆشداری دەدات لەوەی باشترە كەمامە بپۆشرێت و كاریگەریشی زیاتر لەسەر ئەو كەسانە دەبێت كە نەخۆشییەكانی كۆئەندامی هەناسەیان هەیە.
ئەحمەد محەمەد، وتەبێژی دەستەی ژینگەی هەرێم ئەمڕۆ یەكشەممە 4ی نیسان بە تۆڕی میدیایی ئێستای وت، ئەو گازە بریتییە لە دوانەئۆكسیدی گۆگرد (SO2) كە بەهۆی بوركانی سقلییە-وە دروستبووە و دواتر بەهۆی ئاراستە و خێرایی با-وە ڕوو لە ناوچەكەمان دەكات، بەتایبەت وڵاتانی سوریا، ئوردون، عێراق و توركیا.
وتیشی، “كە دێتە ئاسمانی عێراق ئێمەش لێی بەدەرنین و بەپێی پێشبینییەكان ڕەنگە لەماوەی 48 كاتژمێری داهاتوودا بگات”.
“بەڵام بەوشێوازە زۆر زۆر مەترسیدارنییە، وەك ئەوەی باسیدەكرێت، چونكە زیاتر لە هەوادا دەمێنێتەوە، بەڵام پەیوەندی بە خۆپارێزیشەوە هەیە، چۆن ئێستا خەڵك كەمامە دەبەستێت، ئەگەر كەمامە ببەستێت و هەوڵبدات لەماڵەكان نەیەتەدەرێ كاریگەرییەكەی ئاسایی دەبێت” ئەحمەد محەمەد وای وت.
ئەوەشی ڕونكردەوە، بەڵام بەتایبەت ئەو كەسانەی نەخۆشی درێژخایەنیان هەیە وەك ڕەبۆ، هەستیاری یان تەنگەنەفەسی ئەو كەسانە زیاتر كاریگەرییان لەسەر دروست دەبێت.
وتەبێژی دەستەی ژینگە باسی لەوەشكرد، خۆشبەختانە لەم چەند ڕۆژەدا باران نابارێت، چونكە ئەگەر باران بباریایە، دەبووە هۆی ترشە باران، كە ئەوەش هۆكارێكە بۆ پیسكردنی ژینگە.
جەختی لەسەر ئەوەشكردەوە، هەموو گازە ژەهراوییەكان و لەنێویشیاندا گازی دوانەئۆكسیدی گۆگرد كاریگەری دروستدەكەن هەم لەسەر ژینگە و هەم لەسەر تەندروستیی مرۆڤ و ئاژەڵ و بونەوەرەكانی دیكە.
سەبارەت بە ماوەی مانەوەشی لە ئاسمانی ناوچەكەدا ئەحمەد محەمەد وتی، خێرایی با دیاریدەكات كە مانەوەی چەند دەبێت، چەند با خێراتربێت زووتر دەڕوات.
پێشتر سادق عەتییە، پێشبینیكاری كەشوهەوای عێراقی و شارەزای كەشناسی لە فەیسبوكی خۆیەوە بڵاویكردەوە، بەپێی نەخشەكانی ژینگە، شەپۆلێكی گەورەی گازی دوانەئۆكسیدی گۆگرد (So2) ڕوو لە سوریا و دواتر عێراق و توركیا دەكات.
گازەكە بەهۆی تەقینەوەی بوركانی ئیتنا لە دورگەی سقڵیەی ئیتاڵی دەرچووە، وەك ئەوەی عەتییە ئاماژەی پێداوە.
دەشڵێت، گازی دوانەئۆكسیدی گۆگرد گازێكی ژەهراوییە (ئەگەر چڕییەكەی لە هەوادا زۆر ببێت)، بێ ڕەنگە و بۆنێكی ناخۆشی هەیە، بەشێوەیەكی سروشتی لە (چالاكییەكانی بوركان، شیبوونەوەی مادە ئەندامییەكان، كێڵگەكانی نەوت، كارگە و وێستگەكانی بەرهەمهێنانی كارەبا یاخود لە تاقیگەدا) دروستبكرێت.
ئەو شارەزایە هۆشداری ئەوەشدەدات، بوونی گازەكە لە هەوادا دەبێتە هۆی هەڵمژینی و بەمەش زیان بە چاو و كۆئەندامی هەناسە دەگەیەنێت، هەروەك دەشێت لە ئاودا بتوێتەوە و بەمەش بارانێكی زیانبەخشی بەدوادابێت.
