هێزە ئەمنییەکانی ئێران، دوێنێ لە گوندەکانی نزیک بانە، لە سنووری هەرێم و ڕۆژهەڵاتی کوردستان، نزیکەی 20 کەسیان دەستگیرکردووە و هۆکارەکەشیان ئاشکرانەکردووە.
هێزە ئەمنییەکانی ئێران لەڕێگەی فڕۆکەی بێفڕۆکەوانەوە چاودێریی چەند ناوچەیەکیان کردووە و بە ئۆتۆمبێلی “مانگی سوور”ی ئێران نزیکەی 20 کەسیان لە گوندەکانی نزیک بانە گواستووەتەوە.
ڕێکخراوەکانی مافی مرۆڤ لە ڕۆژهەڵاتی کوردستان ڕایدەگەیەنن، “لەکاتی دەستگیرکردنی ئەو کەسانەدا لێدان و مامەڵەی نەشیاویان بەرامبەرکراوە”.
ئەو ڕێکخراوانە ئاماژە بەوەدەکەن، “دوای دەستگیرکردنی ئەو کەسانە، ماڵەکانیان پشکندراوە و تەواوی کەرەستەکانی وەک لاپتۆپ و کامێرا و مۆبایل و پەرتووكەكانیان براون”.
ئاژانسی کوردپا، لە ئامارێکدا ڕایگەیاندووە، “لەماوەی ئەمساڵدا 565 حاڵەتی پێشێلکردنی مافی مرۆڤ، لەلایەن هێزە ئەمنییەکانەوە لە ڕۆژهەڵاتی کوردستان ئەنجامدراون”.
ڕێکخراوەکانی مافی مرۆڤ دەڵێن، “ئەمساڵ 247 هاوڵاتیی کورد دەستگیرکراون و لەو ژمارەیەش 37 کەسیان سزای زیندانی و 134 کەسی دیکەیان سزای لەسێدارەدانیان بۆ دەرکراوە”.
