پێش نیوەڕۆی ئەمڕۆ ڕوداوێكی هاتوچۆ لە سلێمانی ڕویدا و بەهۆیەوە پێنج كەس برینداربوون و بەڕێوبەری سەنتەری فریاگوزاریش دەڵێت، تەندروستی دووانیان ناجێگیرە.
ڕوداوەكە پێش نیوەڕۆی ئەمڕۆ پێنجشەممە 18ی ئازار لە نزیك پردی خەسرەو خاڵ لەسەر شەقامی سالم لە سلێمانی ڕویدا.
سامان نادر، به‌ڕێوه‌به‌ری سه‌نته‌ری فریاگوزاری خێرا لە سلێمانی (122) بە تۆڕی میدیایی ئێستای وت، ئۆتۆمبێلێك بەهۆی خێرایی لێخوڕینەوە كۆنتڕۆڵی لەدەستداوە و بەهۆیەوە خۆی كێشاوە بە عەمودێكدا و وەرگەڕاوە، عەمودەكەش بەر ئۆتۆمبێلێكی دیكە كەوتووە.
وتیشی، “بەهۆی ڕوداوەكەوە پێنج كەس برینداربوون كە برینی دووانیان كاریگەرە و تەندروستییان ناجێگیرە و لەژێر چاودێری پزیشكدان”.
جگە لەو دوو ئۆتۆمبێلە، چەند ئۆتۆمبێلێكی دیكەش زیانی جۆراوجۆریان بەركەوتووە.
