عێراق نزیكەی لەوەی پشكی خۆی لە بازاڕی نەوتی ئەوروپا لەدەستبدات بەهۆی پشتبەستنی زۆری بە كڕیارە ئاسیاییەكانی، بەتایبەت چین و هندستان، وەك ئەوەی سایتی (ئۆیل پرایس) بڵاویكردوەتەوە.
بەپێی سایتەكە ناوەندی پشكی وڵاتانی ئاسیا لە هەناردەی عێراق لەماوەی سێ ساڵی ڕابردوودا بەشێوەیەكی بەرچاو زیادیكردووە، كە گەیشتووەتە نزیكەی 80%ی هەناردەكانی عێراق لەڕێی كێڵگەكانی باشوورەوە لە ساڵی 2020دا.
سایتەكە بەراوردی ئەم ڕێژەیە و ئەو هەناردەیەی كردووە كە لە ساڵانی پێشتر هەبووە، بەجۆرێك لە 60% بوەوە لە 2017 و، 65% بووە لە ساڵی 2018 و 71% بووە لە ساڵی 2019.
بەپێی ڕاپۆرتەكە چین و هندستان نزیكەی یەك لەسەر سێی هەناردەی ڕۆژانەی نەوتی عێراقیان بۆخۆیان بردووە، بە ناوەندی ملیۆن بەرمیلی ڕۆژانە (1.05 ملیۆن بۆ چین و، 0.9 ملیۆن بۆ هندستان).
پێشتر وەزارەتی نەوتی عێراق ڕایگەیاند، هەناردەی نەوتی خامی وڵات لە مانگی شوبات-دا بۆ 2.96 ملیۆن بەرمیلی ڕۆژانە زیادیكردووە، كە مانگی پێشتر (كانونی دووەم) 2.868 ملیۆن بەرمیلی ڕۆژانە بووە.
عێراق، كە دووەم بەرهەمهێنی نەوتی ئۆپیك-ە، پشت بە هەناردەی نەوت دەبەستێت بۆ بەدەستهێنانی نزیكەی زۆرینەی داهاتی وڵات، ساڵی ڕابردوو بەهۆی دابەزینی نرخی نەوتەوە زیانی گەورەی بەركەوت و لە دابینكردنی موچەدا توشی ئاستەنگ هات.
