لەدوای کۆبوونەوەی لەگەڵ عوسمان غانمی، وەزیری ناوخۆی عێراق، مەسرور بارزانی، ڕایگەیاند، لە ئەنجامی هەماهەنگی نێوان حکومەتی هەرێم و بەغداد بۆ لێکۆڵینەوە لەسەر هێرشەکانی سەر هەولێر ئەنجامی باش بە دەستهاتوون.
دوای کۆبوونەوەکە ڕاگەیاندنی ئەنجومەنی وەزیران ئاشکرایکردووە، “مەسرور بارزانی، سەرۆکی ئەنجومەنی وەزیرانی هەرێم و عوسمان غانمی، وەزیری ناوخۆی عێراق، جەختکراوەتەوە لە گرنگیی جێبەجێکردنی ڕێککەوتننامەی شنگال و دەرچوونی میلیشا و هێزه چەکدارە نایاساییەکان لەو ناوچەیە”.
لە ڕاگەیەندراوەکەی ئەنجومەنی وەزیراندا هاتووە، ” وێڕای سوپاسکردنی وەزیری ناوخۆی فیدرڵ بۆ هەوڵەکانی لە پێناو چارەسەرکردنی کێشەکان، مەسرور بارزانی ئاماژەی بە بەردەوامیی سیاسەتی گۆڕینی دیموگرافی و دەستدرێژیکردنە سەر هاووڵاتییانی کورد و داگیرکردنی زەویوزارەکانیان لە کەرکووک و ناوچە کوردستانییەکانی دەرەوەی ئیدارەی هەرێم کردووە، کە ئەم جۆرە دۆخە نائاسایی ونادەستوورییە، لە بەرژەوەندی خەڵکی عێراق نییە و پێویستە ڕێگری لێبکرێت”.
ڕاگەیەندراوەکەی ئاماژەی بەوەشکردووە، ” دانوستانەکانی هەرێمی کوردستان و حکومەتی فیدراڵی تایبەت بە بودجەی عێراق بۆ ساڵی 2021 و هەڵبژاردنەکانی داهاتووی عێراق ، تەوەری دیکەی گفتوگۆکان بووە”.
