كۆمەڵەی داكۆكی لە مافی كرێنشینانی كوردستان رایدەگەیەنێت، بەپێی ئامارەكانی سەرژمێریی عێراق كە لە كۆتایی مانگی رابردوو ئەنجام درا، نیو ملیۆن یەكەی نیشتەجێبوون لە هەرێم زیادەیە.
لە راگەیەندراوەكەی كۆمەڵەی داكۆكی لە مافی كرێنشینانی كوردستاندا هاتووە، لە داتاكانی سەرژمێری لە هەرێم چەند ئامارێك بەدەستهاتوون جێگای گومان و سەرسووڕمانن. بەپێی داتاكانی سەرژمێری نەك قەیرانی نیشتەجێبوون بوونی نییە لە هەرێم، بەڵكو نزیكەی نیو ملیۆن یەكەی نیشتەجێبوون لە ژمارەی خێزانەكان زیاترن و چۆڵن.
ئاماژە بۆ ئەوەش كراوە، لە هەرچوار پارێزگاكەی هەرێم دوو ملیۆن و 28 هەزار و 937 یەكەی نیشتەجێبوون تۆماركراون لە هەمانكاتدا ژمارەی خێزانەكان لە هەرێم یەك ملیۆن و 379 هەزار و 163 خێزانە و بەو پێیە 649 هەزار و 774 یەكە زیاترە لە ژمارەی خێزانەكان.
دەشڵێت، “بە لەبەرچاو گرتنی بوونی نزیكەی 150 هەزار بینای حكومی و بازرگانی و كارگە و كۆگا و سەربازگە هێشتا نیو ملیۆن یەكە لە ژمارەی خێزانەكانی هەرێم زیاترە”.
