فەرەنسا لە وەرزشی تۆپی پێدا هاوشێوەی کۆگایەکی گەورەی یاریزانانە و یانە ئەوروپیە زەبەلاحەکان بەردەوام چاودێری بەهرەکانی ئەم وەڵاتە دەکەن.
لە زۆرینەی یانە جیهانیەکاندا یاریزانانی فەرەنسا باڵادەستیان نیشانداوە و هەندێکیان بە پلەی ئەفسانەبوون گەیشتوون، بەرشلۆنەش وەک هەر یانەیەکی دیکە لە ڕیزەکانی “لێس بلوز” و یانەکانی لیگا 1 وە چەندین یاریزانی دابینکردووە، بەڵام ئەوەی سەیرە فەرەنسیەکان لە بەرشلۆنە سەرکەوتوو نابن و هەندێجار دەبنە کابوسی ڕاهێنەرانی بلاوگرانا.
فەرەنسا ئومتیتی وێرانکرد: هاوینی 2018 ساموێل ئومتیتی کە یەکێکبوو لە باشترین بەرگریکارەکانی بارسا مکوڕی کرد لەسەر بەشداریکردن لە مۆندیال سەرەڕای ئەوەی پێکانی هەبوو.
بەهۆی یاریکردن لەسەر پێکانەکەی ئاستی بەرەوخوار هات و بووە یاریزانێکی یەدەگ، نزیکبوو بە مانچستەر یونایتد بفرۆشرێت بەبڕی 60 ملیۆن، بەڵام ئیدارەی بارسا بۆندەکەیان بە موچەی هەشت ملیۆنی ساڵانە نوێکردەوە و لە ئێستادا هیچ یانەیەک بۆندی پێشکەشناکات و سوودیش بە پێکهاتەکانی کومان ناگەیەنێت.
240 ملیۆن بەهەدەردرا: ئیدارەی جوسێپ بارتۆمیو بڕی 240 ملیۆنیان لە کڕینی عوسمان دیمبیلی و ئەنتوان گریزماندا بەکارخستووە، بەڵام سوودێکی ئەوتۆیان نەبووە و نرخەکانیشیان لەو ئاستە بەرزەدا نەماوە.
تۆدیبۆ شکستێکی دیکە: ساڵی 2018 لە یانەی تولوزەوە بەبڕی ملیۆنێک یورۆ ڕوویکردە بەرشلۆنە، لە بلاوگرانا جێگەی نەبووەوە و بە خواستن ئاڕاستەی شالکە و بەنفیکا و نیسی فەرەنسیکرا.
کلیمۆنت لانگلێت: لە یانەی ئیشبیلیەوە بە 35 ملیۆن یورۆ ڕوویکردە بەرشلۆنە و لە سەرەتاوە باشترین ئاستی پێشکەشکرد، بەڵام لەگەڵ تێپەڕبوونی کات لەو ئاستەدا نەما و ڕوبەڕوی ڕەخنەی ڕوخێنەر کرایەوە.
بەپێی زانیاریەکانی ڕۆژنامەی سپۆرت، لە ئێستادا یاریزانەکە دووچاری کێشەی دەروونی بووە و بەهۆی گووشارە قورسەکانەوە ئیدارەی نوێی یانە بە ئەگەرێکی زۆرەوە دەیفرۆشن.
