وادەی گواستنەوەکانی هاوینەی 2020ی یاریزانان لە خولەکانی ئیتاڵیا، ئەڵمانیا، ئیسپانیا، ئینگلتەرا، فەرەنسا کۆتاییهات، هەندێک لە یانەکان پارەی خەیاڵییان بەکارخست و هەندێکی دیکە جموجۆڵی بەهێزیان نەکرد.
یانەی ڕیاڵ مەدریدی ئیسپانی کە لە ڕووی مرۆیی و داراییەوە یەکێکە لە زەبەلاحترین یانەکانی ئەوروپا، بەهۆی ڕەچاوکردنی زیانە داراییەکان و ڕێساکانی یاری خاوێن لە میرکاتۆی هاوینەی 2020 هیچ بۆندێکی گەورەی واژوونەکرد.
لە بەرانبەردا یانەکانی چێڵسی و مانچستەر سیتی ڕیکۆردی ئەم وەرزەیان شکاند و لەسەروبەندی ئەو یانانە بوون کە زۆرترین خەرجییان هەبووە.
بەپێی زانیارییەکانی ماڵپەڕی ترانسفێرمارکت، چێڵسی لوتکەی ڕیزبەندی ئەو یانانەی گرتووە کە بودجەیان بۆ گواستنەوەی یاریزانان بەکارخستووە، پاشان یانەی مانچستەر سیتی و بەرشلۆنە و یوڤانتۆس.
یەکێک لەو یانانەی چاوەڕوانی هەنگاوی گەورەی لێنەکراوە لیدز یونایتدی ئینگلیزییە، بەڵام بە پێچەوانەوە یانەکە لەم وەرزەدا گەڕایەوە بۆ خولی نایابی ئینگلیزی و سەیر لەوەدایە بڕی (105.2) ملیۆن یورۆی لە گواستنەوەی یاریزانان بەکارخستووە، کە تەنها پێنج ملیۆنی لە بڕی بەکارخراوی یانەی یوڤانتۆس کەمترە.
ڕیزبەندی ئەو یانانەی زۆرترین خەرجیاتیان لە هاوینی 2020دا هەبووە:
- چێڵسی / 247.20 ملیۆن یورۆ
- مانچستەر سیتی / 156.80 ملیۆن
- بەرشلۆنە / 124 ملیۆن
- یوڤانتۆس / 110.20 ملیۆن
- لیدز یونایتد / 105.20 ملیۆن
- بەنفیکا / 98.50 ملیۆن
- تۆتنهام / 98.40 ملیۆن
- ئینتەرمیلان / 97 ملیۆن
- ئەتلەتیکۆ مەدرید / 90 ملیۆن
- ئارسیناڵ / 86 ملیۆن
